A executiva do PSOE local e o Grupo Municipal Socialista pediron, en senllos comunicados remitidos aos medios, “dilixencia” ao goberno municipal de Goretti Sanmartín para declarar a Santiago de Compostela como zona de mercado residencial tensionado.
Por unha banda, a executiva local capitaneada por Aitor Bouza esixiu ao goberno municipal que constitúa de forma urxente a mesa sectorial e elabore toda a documentación necesaria para pedirlle á Xunta a declaración da cidade como mercado tensionado.
“Esta mesma semana, todos somos testemuñas de que os alugueres son inasumibles para os estudantes”, sinala o secretario xeral do PSOE compostelán, que lembra que o PSOE levou ao pleno do 29 de xaneiro unha proposición aprobada por maioría neste sentido.
“Desde entón, os socialistas levamos reivindicado ao goberno municipal a necesidade de que se fagan con urxencia os traballos necesarios e obrigatorios por lei para que se poida solicitar á Xunta a declaración de Santiago como zona de mercado residencial tensionado”, indicou o socialista, que asegura que, “tras meses esperando pola constitución da mesa sectorial” requirida na lei galega, o Concello segue sen facer e dar os pasos necesarios para avanzar na limitación dos prezos dos alugueres.
PREGUNTA AO CONCELLEIRO DE URBANISMO
Pola súa banda, noutro comunicado remitido aos medios, a concelleira socialista Mercedes Rosón informou de que o Grupo Municipal Socialista pedirá explicacións ao goberno municipal polos pasos datos ata agora para conseguir a declaración de Santiago como mercado tensionado. A edil asegurou que as dificultades dos estudantes para atopar piso, sumadas ao prezo “nada alcanzable” dos alugueres, “deben levar a dar novos pasos nas políticas de vivenda”.
Rosón criticou que “medio ano” despois da aprobación da moción no pleno, nada se sabe destes trámites, polo que pediu “dilixencia” ao goberno local e “explicacións”.
Así, no pleno do 19 de xullo o Grupo Municipal interpelará ao concelleiro de Urbanismo para pedirlle contas dos pasos dados ata agora”, “se é que se fixo algo”.
