A secretaria de Organización adxunta do PSdeG, Ana Pena, rexeitou pronunciarse sobre o expediente aberto aos concelleiros socialistas do Concello de Santiago e limitouse a sinalar que “seguirá con rigorosidade” os estatutos do partido. Preguntada respecto diso nunha comparecencia ante os medios na sede do PSdeG, a socialista dixo que é unha cuestión que compete ao órgano provincial e remitiuse á postura da dirección provincial, que a pasada semana celebrou unha executiva na que abordou o asunto das vivendas turísticas.
“A cuestión de Santiago é que é un expediente que está aberto no partido. Compete neste caso ao órgano provincial que xa fixo as súas declaracións”, afirmou para asegurar que “por responsabilidade” a dirección non fará máis declaracións do “procedemento” ata que conclúa.
Neste punto, preguntada sobre se o proceso podería finalizar coa expulsión dos seis concelleiros (a totalidade da representación do partido no Consistorio compostelán), dixo que o expediente seguirá “con rigorosidade” os estatutos do partido. “Non sabemos a situación que se pode dar. Seguiranse os criterios que se establecen nos estatutos e, unha vez que o procedemento conclúa, pois faremos as declaracións que sexan correspondentes e oportunas”, indicou. Por último, sobre se considera que hai marxe para recompor a situación, dixo que “hai marxe para todo”.
