A autora catalá María Girón foi a gañadora do XVII Premio Internacional Compostela de Álbum Ilustrado co proxecto titulado ‘Bim, bam, bum’. Ademais, a obra ‘Voglio andare senza rotelle’ de Tobias Giacomazzi foi finalista.
O premio, organizado pola editorial Kalandraka e o Concello de Santiago, conta cunha dotación económica de 9.000 euros e leva a publicación da obra gañadora en galego, catalán, eúscaro, castelán e portugués no mes de novembro.
‘Bim, bam, bum’ impúxose nunha edición do Premio Compostela á que se presentaron 218 proxectos procedentes de 22 países: España, Italia, Portugal, Canadá, China, Perú, Arxentina, Brasil, Rusia, Estados Unidos, Israel, México, Turquía, Ecuador, Alemaña, Irlanda, Francia, Dinamarca, Bélxica, Chipre, Colombia, Eslovenia e Chile.
Da obra gañadora, o xurado destacou a “frescura dunha historia que mostra a cara lúdica da infancia, na que a amizade é un compoñente esencial”.
Ademais, tamén subliñou a capacidade do proxecto gañador para evocar “a felicidade desa etapa da vida”. “O xogo, a liberdade, o movemento e o humor están presentes, tanto no texto como na ilustración”, engadiu. Segundo o fallo, o texto de María Girón é “sinxelo e musical” e “retoma elementos da tradición oral como os acumulativos, as repeticións e os xogos fonéticos”.
