Situado no número 15 da Rúa do Vilar, na coñecida como Casa Varela, atópase un dos capiteis máis buscados e famosos de Compostela. Nun dos arcos do soportal do edificio, atópase un capitel decorado coa figura dun neno ou anxo espido deitado enriba do que parece un animal.
Esta figura non chama a atención pola súa técnica nin beleza, senón porque é a protagonista dun dos rituais máis curiosos dos que se celebran na cidade. Coñeces o Xubileo Pagano?
Non estamos a falar de nada relacionado coa Igrexa nin coa celebración xacobea, senón nunha celebración anticlerical que tería a súa meta neste capitel.
Eran os anos 60 e os estudantes máis anticlericais da cidade decidiron comezar unha tradición para emular a celebración do ano santo da cidade. Comezaron a poñer de moda o feito de apagar un cigarro no traseiro do anxo espido.
Dende ese momento, tanto estudantes como visitantes apagaban os cigarros nel e hoxe en día ten un burato como mostra da tradición. A día de hoxe, os curiosos que se achegan a ver o capitel meten o dedo no burato.
