Remate’s Store, unha nova tenda en Santiago dedicada á comercialización e venda de artigos non reclamados, devoltos ou non pagados de plataformas como Amazon e Aliexpress, inaugurou hoxe as súas portas na rúa Nova de Abaixo da capital galega.
A tenda promete un concepto atractivo para os consumidores: paquetes sorpresa de 5 e 10 euros, ademais dunha selección de produtos procedentes de roturas de stock, todos ofrecidos a prezos moi inferiores aos habituais nas redes.
“A idea é darlles unha nova vida a estes produtos que, por distintas razóns, non foron reclamados ou vendidos. Ofrecemos aos nosos clientes a posibilidade de adquirir artigos de calidade a un custo moito menor”, explicou o responsable de Remate’s Store a Xornal de Compostela.
A empresa xa conta con dúas sucursais en Portugal e busca distinguirse no mercado local, non só pola orixinalidade do seu inventario senón tamén pola súa especialización nos paquetes sorpresa. “No ámbito dos sobres sorpresa, cremos que ofrecemos algo único que non se atopa noutras tendas da rexión”, explican dende o establecemento.
Aínda que hai outras tendas que operan baixo un modelo similar, como unha pequena tenda en Boiro que tamén vende sobres sorpresa, Remate’s Store asegura que o seu enfoque e a súa escala son distintos. “A este nivel somos os primeiros”, concluíu o propietario.
