A Asociación de Pacientes e Usuarios do CHUS alzou a voz para denunciar a situación de saturación e colapso vivida o pasado 29 de maio no Hospital de Día Oncolóxico, onde ducias de persoas tiveron que agardar durante horas os procesos de atención nos corredores adxacentes ao servizo. Esta situación ocorre a pesar das recomendacións estabelecidas polo Ministerio de Sanidade no ano 2009, que aínda non foron implementadas adecuadamente.
As salas de espera actuais son “manifestamente insuficientes”, segundo a asociación, e están situadas en corredores de paso que non ofrecen as comodidades necesarias como acceso directo aos aseos, fontes de auga fría, ou unha visibilidade adecuada das pantallas de avisos. Isto forza aos pacientes e os seus acompañantes a erguerse repetidamente para seguir os avisos, nun espazo que non conta coas condicións adecuadas de confortabilidade, especialmente para pacientes que enfrontan tratamentos tan exhaustivos como a quimioterapia.
As obras que actualmente están en fase de licitación non parecen resolver estas carencias, xa que a nova sala de espera oncolóxica está sendo construída nunha localización que non cumpre coa recomendación de integración funcional da unidade. Esta sala, situada nunha terraza na primeira planta, require que os pacientes realicen un percorrido pola ala do edificio, tomen o ascensor á planta baixa, e accedan á instalación do Hospital de Día, que non experimentará cambios na súa estrutura actual nin melloras nas súas condicións materiais.
A Asociación agarda que a nova xerencia do hospital tome medidas para mellorar estas condicións, resaltando que “a experiencia dos pacientes e usuarios forma parte do diagnóstico dos problemas e debe integrar os termos das posibles solucións”. Apelan á responsabilidade do xefe do servizo, recentemente galardoado coa medalla Castelao, para non tolerar o continuado maltrato asistencial que estas condicións materiais implican.
