Unha persecución policial de película polas rúas de Santiago de Compostela concluíu coa detención de catro persoas e a identificación doutros oito que trataron de evadir a presenza de axentes na zona de San Caetano. Os feitos ocorreron a última hora da mañá, ao redor das 13.00 horas, cando os tres vehículos emprenderon a fuxida ao ver presenza policial en San Caetano e iniciaron unha fuga polas rúas da cidade, rumbo ao Milladoiro.
Pasaba algo da unha da tarde cando os vehículos que transitaban pola SC-20 á altura da entrada do túnel do Hórreo practicamente tiveron que apartar e abrir paso ante un coche de cor vermella que se achegaba a toda velocidade a unha zona limitada a 50 km/h. Ao tratarse dunha hora de bastante tránsito non atopaba facilmente por onde pasar, así que adicouse a pitar ata que lle abriron paso ao ver que o copiloto facía señas ameazantes ao demais condutores.
Cando atopou vía libre botouse á carreira, entrou no túnel do Hórreo seguido doutro coche que fuxía xunto a el, tamén de cor vermella, e acadaron velocidades que, segundo testemuñas do acontecido, chegarían facilmente aos 100 quilómetros por hora nun túnel onde a velocidade está controlada por radar e limitada a 50 km/h. Dous minutos despois comezaron a aparecer coches da Policía Nacional coas sereas postas que ían tras deles, emprendendo unha persecución que non deixou indiferente a ninguén dos que a presenciaron.
Os coches de Policía Nacional fóronse sucedendo un tras outro e tras outro, ata un total de cinco ou seis vehículos, aos que lle seguiu un furgón e tamén vehículos da Garda Civil de Tráfico. Finalmente, os axentes conseguiron alcanzar a estas persoas no municipio coruñés de Teo, onde lle deron o alto aos vehículos e arrestaron a catro persoas e identificaron as oito restantes. Polo momento descoñécese os delitos que se lle atribúen a estas persoas que, segundo estas fontes, portaban armas brancas, paus e bates de béisbol.
