A Dirección Xeral do Patrimonio da Xunta autorizou a modificación do plan especial de protección e rehabilitación da cidade histórica de Santiago de Compostela para incorporar no seu catálogo, como elemento específico, o mural pintado en 1954 polo artista Urbano Lugrís (1908-1973).
Este mural está nun local de hostalaría, actualmente da cadea 100 Montaditos, situado na Rúa do Franco, número 56. A comezos de ano, a xunta de goberno local de Santiago aprobou a modificación puntual do catálogo do plan especial, á que agora dá luz verde a Consellería de Cultura –encargada dos informes competentes en materia de patrimonio cultural–.
Lugrís realizou este mural para o entón Bar América e foi o último dos que o artista pintou en Santiago que aínda se conserva no lugar para o que fora pensado. De todos os murais dun dos artistas galegos máis destacados do século XX que existían na capital galega perdéronse o do Hotel Compostela e o do bar Lugo, mentres que foron separados da parede os da Clínica Álvarez, que actualmente se atopan esparexidos en coleccións públicas e privadas.
O Catálogo de protección do PE-1 identifica os inmobles que son obxecto de preservación cunha ficha de catalogación para cada edificio, na que se identifican os elementos catalogados, que no caso do edificio que acolle o mural tiña asignado o nivel 4 (interese ambiental) pero non figuraba ningún elemento interior.
