A CIG-Saúde presentou unha denuncia ante a Inspección de Traballo pola situación do Laboratorio central de análise clínica do Hospital Clínico de Santiago de Compostela. A organización sindical considera que a Xerencia non adoptou as actuacións necesarias para corrixir as deficiencias detectadas nas instalacións, malia as advertencias trasladadas nos órganos de representación do persoal e as recomendacións da Unidade de Prevención de Riscos Laborais.
O conflito ten a súa orixe nas obras de ampliación iniciadas durante o último trimestre de 2025, destinadas a incorporar unha nova cadea automatizada para a análise de mostras. Segundo a CIG, a planificación dos traballos desenvolveuse sen unha coordinación adecuada entre as empresas implicadas e os servizos de prevención, o que provocou que a Unidade de Prevención de Riscos Laborais non participase desde as primeiras fases do proxecto.
Esta circunstancia, sostén o sindicato, derivou na configuración de postos de traballo que non reúnen as condicións recomendadas de ergonomía e seguridade. A central asegura que as deficiencias continúan sen resolverse malia o tempo transcorrido desde o inicio da reforma.
Entre as situacións que a CIG pon en coñecemento da Inspección de Traballo figuran a localización de postos de traballo en espazos de tránsito e vías de evacuación, así como a falta de superficie suficiente para que o persoal poida desenvolver as súas funcións nas condicións adecuadas.
A organización tamén advirte da ausencia de espazos apropiados para situar os colectores de residuos, de deficiencias nas condicións térmicas e acústicas e da existencia de duchas de emerxencia que non están operativas. Trátase, segundo o sindicato, de problemas que afectan á seguridade e ao desenvolvemento da actividade diaria no laboratorio.
A CIG asegura que trasladou estas cuestións en distintas reunións da Comisión de Centro e do Comité de Seguridade e Saúde. Porén, denuncia que a Xerencia non incorporou as solucións formuladas pola Unidade de Prevención de Riscos Laborais. A central cualifica de “intolerable” que, case un ano despois do inicio das obras, o persoal continúe exposto ás situacións de risco que identifica.
O SINDICATO CUESTIONA A FALTA DE PARTICIPACIÓN DO PERSOAL NA REORGANIZACIÓN
Outro dos aspectos sinalados pola organización sindical é a escasa intervención das traballadoras e traballadores na elaboración do plan funcional que acompaña a transformación do laboratorio.
A CIG considera que os cambios na distribución dos espazos e nos procedementos de traballo deberían contar coas achegas das persoas que desenvolven diariamente a súa actividade no servizo. “Está a producirse un cambio organizativo importante e as traballadoras son quen mellor coñecen o servizo pero non se escoita a súa voz”, manifesta a central.
COLAPSOS NA NOVA CADEA DE ANÁLISE E DEMORAS NOS RESULTADOS
Ás cuestións relacionadas coa prevención de riscos laborais súmanse, segundo a denuncia sindical, incidencias no funcionamento da nova cadea de procesamento de mostras instalada no laboratorio compostelán.
A CIG informa de episodios recorrentes de acumulación de mostras, que relaciona, entre outros factores, co elevado volume de traballo que debe asumir o sistema. Estas incidencias, asegura, están a ocasionar atrasos na obtención dos resultados das análises clínicas.
O sindicato considera que non se está a estudar con suficiente profundidade a orixe destes problemas para determinar as medidas que permitan resolvelos. “Ditas causas non están a ser analizadas coa necesidade requirida”, sinala.
