O secretario xeral do PSdeG en Santiago e deputado autonómico, Aitor Bouza, denunciou este luns que dous alumnos dun centro de educación especial de Compostela levan todo o curso escolar sen poder acudir ás clases debido á falta de vehículos de transporte adaptados ás súas necesidades de mobilidade. O socialista anunciou que trasladará esta situación ao Parlamento de Galicia para reclamar unha solución á Xunta, á que tamén lle esixe unha revisión dos horarios e das rutas do transporte escolar do centro.
Segundo explicou Bouza, a situación dos dous estudantes deuse a coñecer esta fin de semana, tras a celebración dunha reunión do Consello Escolar do centro de educación especial de A Barcia. Os vehículos encargados do seu traslado non dispoñen dos sistemas de elevación e adaptación necesarios para garantir o acceso en condicións de seguridade, o que impide que ambos os alumnos poidan desprazarse ata as instalacións educativas.
O representante socialista cualificou esta circunstancia de “absolutamente dramática” e criticou que os dous menores continúen sen poder recibir atención educativa presencial desde o inicio do curso. Ante esta situación, anunciou que o seu grupo presentará unha iniciativa parlamentaria para reclamar á Xunta de Galicia a dotación inmediata dun servizo de transporte escolar adaptado que permita a incorporación dos estudantes ás aulas.
“Esixiremos á Xunta de Rueda que poña unha solución inmediata e todas as medidas que sexan precisas para que se garanta ese servizo de transporte escolar adaptado”, manifestou Bouza.
A denuncia do PSdeG non se limita á situación destes dous alumnos. Bouza tamén advertiu de que a organización actual das rutas e dos horarios do transporte escolar está a provocar que parte do alumnado chegue tarde ao centro, o que repercute no desenvolvemento da actividade lectiva e na atención especializada que recibe.
De acordo coas demandas trasladadas pola comunidade educativa durante o Consello Escolar, os atrasos nos desprazamentos están a ocasionar que algúns estudantes perdan sesións educativas e intervencións terapéuticas previamente programadas.
Por este motivo, os socialistas solicitarán ao Goberno autonómico unha reorganización do servizo que permita que todo o alumnado estea no centro antes do comezo das clases e das actividades de atención especializada. Bouza considera necesario revisar tanto os itinerarios como os horarios establecidos para evitar que o funcionamento do transporte interfira no proceso educativo.
OS SOCIALISTAS RECLAMAN UN HORARIO DE 9:00 A 14:00
Outra das cuestións que o deputado compostelán trasladará á Cámara galega é a petición da comunidade educativa de establecer un horario escolar de 09:00 a 14:00, unha proposta que, segundo explicou, conta co respaldo das demandas aprobadas no Consello Escolar.
Bouza defendeu que a organización do transporte debe responder ás características e necesidades do alumnado do centro, especialmente ao tratarse de estudantes que precisan atención educativa especializada e, nalgúns casos, intervencións terapéuticas durante a xornada.
Neste sentido, reclamou á Consellería de Educación que adopte as medidas organizativas necesarias para facer compatible o horario solicitado polo centro coa prestación do servizo de transporte escolar.
O secretario xeral dos socialistas composteláns insistiu en que a planificación educativa non debe quedar condicionada polas limitacións do transporte, senón que este último debe organizarse para garantir o acceso á educación nas condicións que precisa o alumnado.
