O Concello de Santiago estuda acudir á vía xudicial e continuará aplicando sancións á actual concesionaria do Servizo de Axuda no Fogar (SAF) despois de coñecer que a empresa comunicou ás traballadoras a súa intención de non pagar a nómina correspondente ao mes de setembro. A concelleira de Dereitos e Servizos Sociais, María Rozas, asegurou este martes que o Goberno municipal non recibiu polo momento ningunha comunicación oficial da compañía sobre este novo impago e que tivo coñecemento da situación a través do persoal e do comité de empresa.
Rozas compareceu para explicar a posición do Concello despois de que transcendese a situación das traballadoras. Segundo indicou, a empresa tería atribuído a falta de liquidez a supostos atrasos da Administración local no pagamento das facturas, unha explicación que a concelleira rexeitou. O Concello sostén que está ao día nas súas obrigas económicas coa concesionaria e que os pagamentos realizados durante a vixencia do contrato se efectuaron dentro dos prazos establecidos.
Na actualidade, segundo detallou Rozas, existe unha única factura pendente, correspondente ao servizo de agosto e rexistrada pola empresa en setembro. A concelleira explicou ademais que a concesionaria traballa mediante un sistema de ‘factoring’, polo que é unha entidade financeira a que lle adianta os fondos das facturas e posteriormente recibe o pagamento municipal. Por este motivo, insistiu en que o Concello non considera que exista relación entre os seus pagamentos e os problemas da empresa para aboar os salarios.
Os problemas laborais coa concesionaria, segundo expuxo a concelleira, remóntanse a meses atrás. As traballadoras teñen aínda pendente a paga extraordinaria que debían recibir o 15 de xuño, circunstancia pola que o Concello realizou primeiro requirimentos á empresa e posteriormente iniciou un expediente sancionador. O contrato establece que a adxudicataria debe estar ao corrente no pagamento das nóminas e contempla como incumprimento os atrasos ou impagos superiores a dous meses.
Rozas concretou que o primeiro expediente contempla unha penalidade de 5.000 euros por unha infracción grave, ao considerar incumprida unha obriga esencial do contrato. O prazo da empresa para presentar alegacións rematou o 24 de setembro e a sanción deberá ser aprobada definitivamente pola Xunta de Goberno. “Non vai ser a única”, advertiu a concelleira, que confirmou que existen outros incumprimentos polos que se están tramitando novas medidas.
A responsable municipal defendeu que o Concello empregará os instrumentos previstos nos pregos para actuar ante os impagos, aínda que recoñeceu que estas ferramentas poden resultar insuficientes para unhas traballadoras que necesitan percibir os seus salarios a final de mes. Rozas tamén confirmou que o Goberno local non descarta explorar a vía xudicial, aínda que pediu prudencia porque esta alternativa non permitiría unha resposta inmediata.
“Non descartamos a vía xudicial”, afirmou, antes de sinalar que o Concello está analizando as posibilidades cos departamentos xurídicos. A prioridade municipal, segundo reiterou durante a comparecencia, será manter a atención ás persoas usuarias e defender as condicións das profesionais que prestan o servizo.
A situación prodúcese ademais cando o actual contrato do SAF está próximo a finalizar e a nova licitación xa se atopa na fase de valoración das ofertas. O contrato inicial rematou o 31 de maio, despois de dous anos de vixencia, e o Concello acordou unha prórroga de cinco meses, pese a que os pregos permitían ampliala durante un ano.
Rozas explicou que a decisión de limitar a extensión a cinco meses respondeu á intención municipal de que a actual concesionaria deixase de prestar o servizo unha vez estivese preparada a nova adxudicación. Tamén rexeitou cualificar a extensión do contrato como unha prórroga imposta á empresa, xa que esta posibilidade figuraba nas condicións aceptadas pola compañía cando concorreu á licitación.
Na nova convocatoria presentáronse catro empresas e a última mesa de contratación celebrouse o pasado venres. O Goberno municipal pretende completar a valoración “o máis rápido posible”, aínda que Rozas incidiu en que a existencia dun novo procedemento de contratación non modifica as obrigas da actual concesionaria durante o período no que continúe prestando o SAF.
O novo contrato contará cun orzamento de 7,2 millóns de euros, un 14% máis que o actual. Rozas lembrou que en 2023 xa se incrementara a dotación do servizo desde os 3,6 millóns do mandato anterior ata os 6,3 millóns. Segundo defendeu, estas subas teñen como finalidade mellorar a prestación e as condicións laborais do persoal.
A EMPRESA ALEGARA PROBLEMAS TRANSITORIOS DE LIQUIDEZ
Sobre os motivos dos atrasos, Rozas explicou que a concesionaria atribuíra anteriormente o impago da paga extraordinaria de xuño a unha situación transitoria de liquidez. Segundo a versión trasladada ao Concello, a empresa acordara daquela coas traballadoras non realizar pagamentos parciais e agardar ata poder afrontar a cantidade completa.
Co paso dos meses e ao persistir o impago, o Concello iniciou os requirimentos previstos no contrato e abriu o expediente sancionador. Rozas sinalou que non entende que a situación económica explique por si mesma os incumprimentos, ao asegurar que as empresas que integran a UTE contan con actividade e contratos noutros municipios de Galicia e do resto do Estado.
O Goberno municipal manterá nos próximos días reunións coas traballadoras e continuará avaliando as alternativas xurídicas. Sobre unha posible rescisión anticipada, Rozas apuntou que o contrato actual se encontra xa nos seus últimos meses, mentres a nova licitación avanza na valoración das ofertas, polo que o Concello centrará as actuacións inmediatas en reclamar o pagamento dos salarios e aplicar as penalidades que correspondan polos incumprimentos.
