O Festival Maré celebrará do 23 ao 27 de setembro a súa sétima edición en Santiago de Compostela, cun programa que reunirá artistas procedentes de máis de 16 países e representación de 12 linguas. A cita contará con máis de 30 espectáculos e levará concertos e actividades culturais a diferentes escenarios da cidade durante cinco xornadas.
A programación foi presentada este martes coa participación do comisario do Xacobeo 2027, Marcos Gómez Román, e do secretario xeral da Lingua, Valentín García. O festival conta co apoio da Xunta de Galicia a través dos Concertos do Xacobeo e volverá artellar a súa proposta arredor do encontro entre diferentes culturas, tradicións musicais e comunidades lingüísticas.
Gómez Román destacou durante a presentación a dimensión intercultural do evento e a súa capacidade para conectar creacións procedentes de distintos territorios. “Maré pon en contacto realidades culturais diferentes e permite que esa diversidade se converta nun punto de encontro, xerando novas conexións a través da creación”, afirmou. Segundo engadiu, este intercambio entre linguas e culturas “enriquece a oferta cultural galega e reforza a vocación de Galicia como territorio aberto ao intercambio e á creación internacional”.
O comisario do Xacobeo 2027 tamén vinculou a celebración do festival coa actividade turística de Santiago fóra dos meses de maior afluencia. “Os grandes eventos culturais axudan a ampliar os motivos polos que visitar as nosas cidades ao longo do ano e permiten seguir xerando actividade fóra dos meses de maior afluencia turística”, indicou. Na mesma liña, sinalou que Maré “combina unha programación singular coa propia experiencia de descubrir Santiago, facendo que a cultura e a cidade formen parte dun mesmo atractivo para quen nos visita”.
A diversidade lingüística terá tamén unha presenza específica dentro da programación. O 26 de setembro, coincidindo coa celebración do Día Internacional das Linguas, o festival desenvolverá actividades centradas neste ámbito. Valentín García considerou que a programación permite poñer en relación diferentes comunidades a través dos seus idiomas. “Esta iniciativa demostra unha vez máis o poder da lingua para estreitar lazos, tender pontes e descubrir novas culturas”, sinalou.
MÁIS DE 30 ESPECTÁCULOS E OITO PROPOSTAS INÉDITAS EN GALICIA
A sétima edición de Maré estará integrada por máis de 30 espectáculos, catro producións propias, oito propostas que se poderán ver por primeira vez en Galicia e unha estrea absoluta. Entre os nomes anunciados figuran Aterciopelados, Bia Ferreira, Omar Souleyman, Haydée Milanés & Javier Colina, Ala.ni, António Zambujo, Magalí Sare & Vox Stellae e Marcos Coll.
A programación abrangue estilos como o jazz, o folclore, as músicas de raíz, o rock, o reggae, a trova cubana, a samba, o fado ou o blues. O cartel incorpora artistas e proxectos vinculados á lusofonía, ás diásporas e a diferentes territorios de América Latina, África e Asia, cunha combinación de linguas, tradicións e expresións musicais procedentes de contextos culturais diversos.
Os espectáculos distribuiranse por distintos puntos de Santiago. Entre os escenarios previstos están o Teatro Principal, a Sala Capitol, o Auditorio de Galicia, a praza de Mazarelos, Riquela, o CSC Maruxa e Coralia, a Casa das Crechas, a Casa das Máquinas e a Igrexa da Universidade. O festival estenderá así a súa actividade tanto por equipamentos culturais como por salas e espazos situados en diferentes zonas da cidade.
A programación non se limitará aos concertos. Maré incluirá tamén encontros, obradoiros, actividades participativas e outras propostas culturais, co obxectivo de facilitar o intercambio entre artistas, públicos e diferentes comunidades culturais presentes durante o festival.
PROGRAMACIÓN DOS CONCERTOS DO XACOBEO
Maré forma parte este ano da programación dos Concertos do Xacobeo, iniciativa impulsada por Turismo de Galicia que integra festivais, ciclos e actuacións musicais repartidos por toda a comunidade. O programa abrangue máis de 190 festivais, ciclos e concertos en máis de 80 localidades galegas.
