Dúas persoas foron detidas o pasado domingo tras ser pilladas ‘in fraganti’ mentres roubaban xoias nun domicilio no centro de Santiago de Compostela. O dispositivo, coordinado desde a comisaría da Policía Nacional da capital galega, logrou deter ás dúas persoas dentro da vivenda sobre as 02.30 horas da madrugada.
O operativo comezou tras saltar a alarma de intrusión do inmoble, que os propietarios recibiron no seu teléfono móbil, xa que se atopaban de vacacións. A través das cámaras, observaban que alguén accedera, escoitaron un ruído e cubriuse a cámara, cortándose a imaxe. Así, deron aviso á policía que, unha vez no lugar, viron luces no piso e sombras. Nese momento, accederon ao domicilio e procederon á detención destas dúas persoas.
A continuación, os axentes comprobaron que as habitacións estaban revoltas, con reloxos, xoias e unha caixa forte preparadas sobre as camas. Ademais, ao chequear o resto do edificio, a Policía comprobou que todas as portas estaban marcadas con pequenos fíos de silicona na súa parte baixa, case inapreciable á vista. Os homes detidos, sen domicilio coñecido en España, procedían segundo os investigadores, do Leste de Europa, e intervéuselles un vehículo estacionado na mesma rúa, do cal portaban as chaves.
