O conselleiro de Educación, Ciencia, Universidades e FP, Román Rodríguez, supervisou o avance das obras de construción do novo Colexio Gerardo Fernández Albor, no Milladoiro. A previsión é que os traballos, executados polo Grupo Puentes, rematen antes de setembro de 2027 e que o centro entre en funcionamento no curso 2027/28. Neste contexto, o Consello da Xunta aprobou este luns poñerlle ao colexio o nome do primeiro presidente electo da Xunta pola súa “contribución á consolidación da Galicia autonómica”. Román Rodríguez lembrou que durante o mandato de Gerardo Fernández Albor “estruturouse a organización do ensino galego”.
MÁIS DE 11,6 MILLÓNS DE INVESTIMENTO
A Xunta está a investir máis de 11,6 millóns de euros na construción deste centro educativo, que contará con espazos polivalentes e flexibles. O deseño propón volumes baixos e adaptados á paisaxe, cunha boa iluminación natural e en contacto visual cos espazos exteriores de patio e xardín, especialmente nas zonas de uso colectivo. O colexio contará tamén cun foro multifuncional concibido como un espazo aberto de aprendizaxe. Situarase na zona central da primeira planta, conectando as diferentes estancias e relacionándose co patio a través dunha gran xanela protexida da incidencia do sol.
DEZAOITO AULAS ENTRE INFANTIL E PRIMARIA
O novo centro terá unha superficie construída de 4.886 metros cadrados, distribuída en dúas plantas. Disporá de seis aulas de Educación Infantil e 12 de Educación Primaria, cos seus correspondentes aseos, así como outras catro aulas de apoio e desdobre de grupos. As instalacións completaranse cunha aula de música, unha sala polivalente e un Polo creativo.
BIBLIOTECA, XIMNASIO E COMEDOR
O proxecto inclúe ademais biblioteca, ximnasio con vestiarios, comedor e zonas de servizos comúns. Na área de administración haberá despachos, conserxaría e un local para a ANPA, entre outros espazos. A Xunta destaca que o novo colexio foi deseñado para ofrecer unha contorna educativa moderna, funcional e adaptada ás novas formas de ensino e aprendizaxe.
