O Consello da Xunta autorizou este luns a licitación do contrato de execución das obras de construción de 79 vivendas de promoción pública (VPP), que se construirán na parcela 1 (S-15), na rúa Agriños, en Ou Milladoiro, nunha parcela cedida polo Concello de Ames.
O importe de licitación do contrato superará os 14,7 millóns de euros (14.756.088,53 euros). A parcela onde se situarán as VPP ten unha superficie aproximada de 1.725,00 metros cadrados e a edificación proxectada terá unha superficie construída total de 9.223,80 metros cadrados sobre rasante e 3.111,61 metros cadrados baixo rasante, cunha superficie total de 12.335,41 metros cadrados.
En conxunto, o edificio previsto constará dunha planta de dous sotos destinados a garaxes, trasteiros e locais de instalacións, que ocupará toda a superficie da parcela; unha planta baixa dedicada a dous soportais de uso público, tres portais de acceso, locais de instalacións, reserva para o almacén de colectores do lixo, cuartos de limpeza, e comercial; e cinco plantas altas e ático para uso como vivenda.
