Un incendio orixinado nun edificio do centro de Santiago de Compostela afectou este xoves a unha vivenda do último piso, onde quedou calcinada unha das habitacións. O suceso non provocou danos persoais, xa que no momento no que se iniciou o lume non había ningunha persoa no interior do domicilio. Un particular alertou o 112 Galicia ás 07.00 horas despois de observar fume saíndo dunha das ventás do quinto piso dun inmoble situado na rúa Santiago de Guayaquil.
Ata o lugar desprazáronse efectivos dos Bombeiros de Santiago, que se encargaron de extinguir as lapas. Segundo a información facilitada pola central de emerxencias, os veciños do edificio abandonaron o inmoble polos seus propios medios, sen necesidade de ser evacuados polos servizos de emerxencia. O incendio concentrouse principalmente nunha das estancias da vivenda, aínda que o fume acabou afectando o resto da casa e tamén as escaleiras da quinta planta.
