Un camioneiro faleceu este venres nun accidente de tráfico rexistrado na AP-53, ao seu paso polo municipio coruñés de Vedra, segundo informou o servizo de emerxencias 112 Galicia.
O sinistro produciuse pouco antes das 15:00, á altura do quilómetro 14,5 da autoestrada, na parroquia de San Mamede de Ribadulla. Segundo a información trasladada ao 112, un camión impactou contra a varanda da vía e o seu condutor quedou no interior da cabina, precisando asistencia sanitaria urxente.
O primeiro aviso chegou a través do 061, que comunicou o ocorrido á central de emerxencias. Poucos minutos despois, un particular confirmou a situación e advertiu da gravidade do accidente, ao indicar que a persoa que conducía o vehículo permanecía atrapada no interior.
Ata o punto desprazáronse os servizos sanitarios, que mesmo mobilizaron o helicóptero medicalizado con base en Santiago, así como os Bombeiros de Ordes, o GES da Estrada, a Garda Civil de Tráfico e efectivos de Protección Civil.
A pesar da intervención dos equipos de emerxencia e dos intentos de reanimación, incluída a práctica dunha reanimación cardiopulmonar, os profesionais sanitarios non puideron facer nada por salvarlle a vida ao condutor.
