O Concello de Santiago celebrará do xoves 11 ao sábado 13 de xuño unha nova edición do ‘Prima 2026’, a festa do comercio local coa que se busca incentivar as compras nos establecementos de proximidade e achegar novos públicos ás tendas de barrio. A programación deste ano pon o foco especialmente no público familiar e na mocidade, dous sectores que, segundo explicou a tenenta de alcaldesa María Rozas, se atopan máis afastados das dinámicas tradicionais do pequeno comercio.
Rozas sinalou que o obxectivo desta iniciativa é “animar as vendas do pequeno comercio, mellorar a experiencia de compra e achegar novos perfís de clientela”. Nesa liña, incidiu en que a edición deste ano está deseñada para atraer familias e mozos e mozas, que en moitos casos optan por outros modelos de consumo, especialmente a compra en liña.
A concelleira fixo tamén un chamamento ao tecido comercial compostelán para que participe activamente na celebración. Pediu aos establecementos que saquen os seus produtos á rúa, decoren os escaparates e utilicen as bolsas e folletos da campaña, co obxectivo de contribuír a crear un ambiente festivo nos diferentes espazos comerciais da cidade.
Un dos elementos centrais do ‘Prima 2026’ volverá ser a ruleta de agasallos ‘Merco aquí’, unha das propostas con maior acollida nas edicións anteriores. A ruleta estará instalada o venres 12 pola tarde na Praza Roxa, en horario de 17:00 a 19:30, e o sábado 13 pola mañá na Praza de Abastos, de 11:30 a 14:00.
Poderán participar nela as persoas maiores de seis anos que presenten un tícket de compra no comercio local de Santiago por un importe igual ou superior a 5 euros. Serán válidos os tíckets correspondentes a compras realizadas entre o 8 e o 13 de xuño, ambos incluídos. Cada tícket dará dereito a unha tirada, aínda que non se poderán presentar máis de dous tíckets dun mesmo establecemento e cada persoa poderá obter un máximo de tres premios.
Os agasallos proceden tamén do comercio local compostelán e non poderán ser trocados. Rozas explicou que haberá “un pouco de todo”, con especial presenza de produtos dirixidos ao público infantil e familiar, como libros ou xogos de mesa, aínda que tamén haberá premios doutro tipo. A edil lembrou que a ruleta garante premio seguro, aínda que o agasallo dependerá da tirada que realice cada participante.
A programación comezará o xoves 11 de xuño pola tarde con dous pasarrúas que partirán ás 18:00 desde distintos puntos da cidade. Por unha banda, o pasarrúas teatral de Rocina e Benito sairá da Praza de Vigo, mentres que a proposta musical da familia Boca-Pier iniciará o seu percorrido en Concheiros. Ambos itinerarios confluirán posteriormente na Praza de Abastos, nunha acción pensada para dinamizar as rúas comerciais e atraer público cara aos establecementos.
O venres 12 de xuño, a Praza Roxa será un dos principais escenarios da festa. A partir das 18:00 actuará Caramuxo Teatro e, desde as 19:00, será a quenda de ‘Abandados Insetos’, un proxecto musical de rock en galego orientado a nenos e nenas a partir dos tres anos. Ese mesmo día, tamén ás 19:00, a Praza 8 de Marzo acollerá a actuación de ‘Unha señora orquestra’, unha proposta da actriz Ailén Kendelman que combina música e humor.
Rozas destacou que a programación procura distribuír as actividades por diferentes barrios e espazos de Santiago, co propósito de descentralizar a festa e levar a dinamización comercial máis alá dun único punto da cidade.
A última xornada, o sábado 13 de xuño, contará con actividades de mañá e de tarde. Ás 12:00, na Praza Roxa, a escola compostelá Brincadeira Clan ofrecerá unha sesión de baile para a mocidade, cunha exhibición e un obradoiro aberto para aprender algúns pasos básicos. Máis tarde, ás 13:00, a Praza de Feixóo acollerá o concerto de Moaré, banda compostelá que combina pop, electrónica, funk e música disco.
A programación musical continuará ese mesmo sábado na Praza de Feixóo, onde a partir das 20:00 actuará Lideira. Ademais, a festa completarase co espectáculo teatral ‘A illa sen tesouro’, da compañía Ghazafelhos, dentro dunha oferta pensada para público familiar.
