O Instituto de Investigación Sanitaria de Santiago de Compostela (IDIS) participou nun estudo internacional que permitiu identificar factores xenéticos asociados á aparición de fatiga física persistente tras a radioterapia en pacientes con cancro de próstata. Os resultados do traballo foron publicados na revista científica Nature Communications e baséanse na análise de datos de 1.381 pacientes.
A investigación centrouse nun dos efectos secundarios que poden aparecer tras os tratamentos oncolóxicos. Segundo explican os autores, a fatiga relacionada co cancro pode prolongarse durante meses ou anos despois da terapia e afectar de maneira significativa á calidade de vida das persoas afectadas.
O estudo identificou unha variante do xene ACTR3, relacionado coa organización do esqueleto celular, que se asocia cunha maior probabilidade de desenvolver este síntoma de forma prolongada. En concreto, os investigadores observaron que os pacientes portadores desta variante xenética e que non presentaban fatiga durante o tratamento tiñan un risco case tres veces superior de sufrir cansazo persistente ata dous anos despois de finalizar a radioterapia.
O primeiro coautor do traballo, Miguel Elías Augado, destacou a relevancia clínica deste problema ao sinalar que “a fatiga relacionada co cancro non é unha simple sensación de cansazo. É un esgotamento profundo, desproporcionado á actividade realizada, que pode durar anos e limitar a vida diaria dos pacientes”.
Ademais da identificación destes factores xenéticos, a investigación revelou unha posible relación entre a fatiga inducida pola radioterapia e a Encefalomielitis miálxica. Os científicos comprobaron que a mesma rexión xenética asociada ao cansazo persistente en pacientes oncolóxicos presenta tamén unha correlación estatisticamente significativa coa síndrome de fatiga crónica.
