A alcaldesa de Santiago, Goretti Sanmartín, e a reitora da Universidade de Santiago de Compostela, Rosa Crujeiras, mantiveron este martes a primeira reunión de traballo conxunta cos equipos de ambas institucións co obxectivo de establecer unha dinámica de coordinación para abordar cuestións compartidas e impulsar novas liñas de colaboración.
O encontro serviu para iniciar unha etapa de contactos técnicos e coordinación entre departamentos, centrada na análise dos asuntos que afectan tanto á administración local como á universidade e na definición de retos e proxectos que poidan desenvolverse de maneira conxunta.
Na representación municipal participaron, ademais da alcaldesa, o coordinador Xosé Antón Freire; a tenente de alcaldesa María Rozas; a segunda tenente de alcaldesa Míriam Louzao; e os concelleiros Xesús Domínguez, Pilar Lueiro e Iago Lestegás, responsables de áreas vinculadas a servizos sociais, promoción económica, cultura, turismo, educación, medio ambiente, deportes, rural, urbanismo ou vivenda, entre outras competencias.
Pola súa parte, a USC estivo representada, xunto á reitora, polos vicerreitores Lorena Añón, Pablo Durán, Ana Cabanas Iglesias e Marcelo Maneiro, ademais do xerente da institución académica, Juan Díaz Villoslada, e do xefe de gabinete, Emilio Martínez.
A reunión dá continuidade ao primeiro contacto institucional entre ambas responsables, celebrado a comezos de maio no Concello compostelán tras o recente nomeamento de Rosa Crujeiras á fronte da universidade. Naquela visita institucional, a reitora asinara no Libro de Honra acompañada por integrantes da corporación municipal.
Naquel encontro inicial, Concello e universidade xa coincidiran na necesidade de consolidar a cooperación desenvolvida nos últimos anos e abrir novas vías de traballo compartido.
