O portavoz municipal do Partido Popular en Santiago, Borja Verea, presentou este luns o primeiro bloque dunha nova campaña política coa que, segundo avanzou, irá anunciando durante as próximas semanas propostas dirixidas especialmente ás familias compostelás, con medidas enfocadas na conciliación, a mobilidade e a organización diaria.
Durante a súa comparecencia, Verea asegurou que tras anos percorrendo barrios e falando con asociacións, familias e centros educativos, e tamén dende a súa experiencia persoal como pai, detecta entre moitos proxenitores composteláns unha sensación compartida de “vivir sempre correndo” para compatibilizar horarios escolares, actividades e obrigas cotiás. Neste contexto, defendeu que “criar un fillo en Santiago non pode ser unha carreira de obstáculos” e apostou por unha cidade “máis amable, máis familiar e máis fácil de vivir”.
A primeira das medidas anunciadas consiste en que o Concello asuma directamente a organización das actividades extraescolares nos centros educativos, substituíndo ás ANPA que así o desexen. Verea sinalou que as asociacións de nais e pais realizan un labor “extraordinario”, pero considerou que non deben funcionar como prestadoras de servizos. A súa proposta pasa por ofrecer dende a administración local actividades deportivas, artísticas, tecnolóxicas ou de idiomas, buscando, segundo explicou, “igualdade entre barrios e centros escolares”, tanto públicos como concertados.
O líder popular precisou que este modelo sería voluntario e que cada ANPA podería decidir se cede total ou parcialmente esa responsabilidade ou se mantén actividades específicas pola súa conta.
No ámbito da mobilidade, Verea presentou a chamada ‘parada familiar’, un sistema de estacionamento rápido en puntos próximos a farmacias, centros escolares, escolas infantís ou centros de saúde, pensado para xestións breves vinculadas ao coidado de menores. Segundo explicou, a iniciativa pretende evitar que as familias teñan que investir longos períodos na procura de aparcamento en situacións urxentes ou cotiás. Sobre o seu funcionamento, recoñeceu que o control dependería da vixilancia municipal e do cumprimento das normas por parte da cidadanía.
A terceira proposta é a creación dunha ‘bolsa familiar zona azul’, baseada nunha bolsa de horas gratuítas de estacionamento regulado para familias, co obxectivo de reducir o que definiu como unha “penalización diaria” asociada aos desprazamentos e xestións familiares.
Verea enmarcou estas iniciativas nun proxecto político máis amplo orientado ás eleccións municipais do vindeiro ano, aínda que evitou centrar o foco exclusivamente na súa candidatura. “O importante non é a candidatura. O importante é a cidade”, afirmou, incidindo en que o seu obxectivo é “construír unha alternativa de goberno” para abrir “unha nova etapa” en Santiago.
O portavoz popular asegurou que a campaña busca sumar apoios cidadáns arredor dese proxecto e avanzou que cada semana irá detallando novas medidas “menos de discursos baleiros e máis de solucións”, centradas na vida diaria dos composteláns.
UNHA PROPAGANDA ENVIADA POLO PP AOS FOGARES, VINCULADA Á “ALTERNATIVA DE CAMBIO”
Preguntado por Xornal de Compostela sobre o envío dun folleto informativo aos domicilios composteláns antes de que o Partido Popular confirmase oficialmente a súa candidatura á Alcaldía, Borja Verea evitou presentar esa acción como unha confirmación formal, aínda que reivindicou con claridade o seu papel como referente da oposición e líder do proxecto político popular en Santiago.
Segundo explicou, o obxectivo principal desa campaña era “construír xuntos a cidade” e ampliar a base social da súa proposta política, convidando á cidadanía a sumarse ao que definiu como unha “alternativa de cambio”. Verea sinalou que a información distribuída incluía vías de contacto para incorporar veciños ao proxecto e reforzar o equipo arredor da súa proposta.
“O candidato, o líder da oposición durante os últimos anos, é o que está falando aquí”, respondeu, dando por feito o seu liderado dentro desa alternativa sen aclarar expresamente os tempos da designación oficial.
O portavoz popular insistiu en que, a un ano das eleccións municipais, percibe na rúa unha crecente demanda de cambio político en Santiago e unha vontade de “abrir unha nova etapa”, polo que enmarcou tanto o folleto como a nova campaña de propostas nun proceso de construción política sostido no tempo e centrado, segundo dixo, en ofrecer unha cidade “que funcione mellor” e facilite a vida diaria da veciñanza.
