As concelleiras Non Adscritas de Santiago de Compostela reclamaron este mércores que se esclareza “con celeridade” a denuncia dunha presunta agresión homófoba ocorrida na zona da cidade vella, despois de que unha das vítimas fixese públicos os feitos a través das redes sociais.
Segundo o relato difundido, as persoas afectadas terían sufrido insultos como “bujarras de mierda” ou “maricóns” antes de producirse unha agresión física na que unha delas resultou ferida cun corte na cara.
Ante a gravidade da denuncia, Mercedes Rosón, Gonzalo Muíños, Mila Castro e Marta Álvarez trasladaron, a través do seu portavoz, “toda a solidariedade e apoio ás vítimas destas agresións homófobas” e subliñaron que episodios deste tipo “non representan á veciñanza nin ao modelo de cidade que somos e aspiramos a seguir sendo”.
“Compostela sempre foi unha cidade aberta, diversa e orgullosa da convivencia en liberdade”, sinalou Gonzalo Muíños, quen advertiu da necesidade de actuar con firmeza fronte a calquera manifestación de odio ou discriminación.
O portavoz das edís non adscritas pediu unha resposta decidida por parte das institucións e apelou tamén á responsabilidade colectiva para facer fronte á intolerancia. “As rúas de Compostela deben seguir sendo espazos seguros, libres de odio e discriminación. Debemos poñer pé en parede fronte á intolerancia e ofrecer respostas contundentes desde as institucións ante feitos coma estes”, afirmou.
Muíños reiterou ademais o compromiso do grupo coa defensa da diversidade, da igualdade e das liberdades individuais, incidindo en que estes principios forman parte esencial da convivencia democrática en Santiago. Mentres continúan as demandas de esclarecemento, as concelleiras solicitaron que se depuren responsabilidades unha vez se coñezan con precisión as circunstancias do sucedido.
