A concelleira do Partido Popular no Concello de Santiago, Nerea Barcia, reclamou este luns ao goberno local, formado por BNG e Compostela Aberta, que tome medidas de forma inmediata para facer fronte á acumulación de problemas que padece a parroquia de Berdía, afectando tanto á mobilidade como á seguridade e ao benestar dos seus habitantes.
Segundo Barcia, os dous accesos principais á parroquia atópanse nun estado que dificulta o tráfico de vehículos e de peóns, o que supón, ao seu xuízo, un risco real para quen os utiliza a diario. A edil popular salientou que, malia existir unha actuación contemplada a través do Plan de Obras e Servizos (POS) da Deputación da Coruña, esta non se chegou a executar. “As veciñas e veciños non poden seguir agardando indefinidamente por unha solución, posto que, apesar das súas reclamacións ao goberno nacionalista, non obteñen resposta algunha”, afirmou Barcia.
A representante popular identificou tamén o contorno da igrexa parroquial como un espazo con carencias importantes. Entre os problemas sinalados figuran as lousas en mal estado, a falta de mantemento das escaleiras e, de xeito particular, a ausencia dunha rampla que garanta o acceso a persoas con mobilidade reducida, maiores e familias con carriños de bebé.
A situación da pista cuberta da parroquia foi outro dos asuntos postos sobre a mesa pola concelleira. Barcia denunciou problemas de iluminación, canalóns sen limpar e a falta de información sobre a reposición das canastras de baloncesto, circunstancias que, segundo ela, reducen a utilidade deste espazo e aceleran o seu deterioro. “O abandono da pista cuberta da parroquia limita o seu uso e deteriora unha infraestrutura fundamental para a veciñanza”, subliñou.
Por último, Barcia cargou contra o goberno local polo que cualificou de “incumprimento” na convocatoria do Consello do Rural, un órgano de participación que, segundo indicou, debía reunirse tras a Semana Santa e que aínda non se celebrou. Para a edil popular, esta demora é “unha mostra máis da falta de planificación, de transparencia e de vontade política deste goberno de BNG e CA”.
O goberno municipal non realizou, ata o momento de publicación desta información, declaracións en resposta ás críticas formuladas polo Partido Popular.
