O concelleiro de Urbanismo e Vivenda, Iago Lestegás, desprazouse esta semana ata Reus para tomar parte nun taller organizado pola Escola de Arquitectura da Universidade Rovira i Virgili, onde estudantes de cuarto curso da materia de Proxectos e Urbanismo están a desenvolver traballos sobre distintas áreas da capital galega.
A sesión, que se estendeu ao longo de cinco horas e contou coa presenza de catro profesores da institución académica catalá, permitiu ao edil achegarse aos proxectos elaborados polo alumnado e trasladar suxestións e valoracións sobre os mesmos. “Foi unha sesión moi interesante en que os nove equipos de estudantes presentaron cadanseus proxectos sobre diferentes ámbitos da cidade que deben ser obxecto de reflexión arquitectónica e urbanística”, declarou Lestegás ao seu regreso a Santiago.
En total, nove equipos de traballo están a analizar seis localizacións concretas do municipio: a explanada de Salgueiriños, a canle do rego do Corgo, a avenida do Restollal, os núcleos rurais de Combarro e Angrois e o borde occidental da avenida de Romero Donallo. Entre os enfoques que comparten varios deses proxectos destaca a redución da presenza do vehículo privado en vías consideradas sobredimensionadas, como as avenidas de Romero Donallo, Cruceiro da Coruña e Restollal. Distintos grupos comparten ademais propostas orientadas á renaturalización de espazos fluviais, ao impulso do comercio de proximidade e á dotación de espazos públicos e equipamentos de calidade para a cidadanía.
Esta visita á escola catalá é a terceira ocasión na que Lestegás participa como convidado nunha institución dedicada á formación en arquitectura con interese polo urbanismo compostelán. A primeira tivo lugar en outubro de 2024, cando o concelleiro expuxo ante estudantes de quinto curso de Urbanismo da Escola de Arquitectura da Universidade de Florencia o modelo de cidade compacta, verde e equitativa que o Concello de Santiago trata de impulsar. A segunda produciuse o pasado 22 de abril, cando acudiu á Escola de Arquitectura da Coruña para participar na materia ‘Actuacións Urbanísticas Contemporáneas’ e abordar co alumnado as estratexias municipais para contrarrestar, mediante ferramentas urbanísticas, os efectos do turismo sobre a vivenda e o tecido comercial da cidade.
