O concelleiro de Mobilidade de Santiago, Xan Duro, explicou este xoves que as incidencias rexistradas nas liñas 6A e 12 do transporte urbano responderon a problemas concretos acontecidos durante a xornada e non a un mal funcionamento estrutural do servizo, despois das queixas veciñais polos atrasos e problemas detectados nestes percorridos.
Segundo detallou o edil, no caso da liña 6A produciuse un accidente no que se viu implicado un terceiro alleo ao autobús, o que provocou danos nunha lúa do vehículo e obrigou a retiralo temporalmente para a súa reparación. Esta situación ocasionou desaxustes nos horarios previstos e atrasos ao longo do día.
No que respecta á liña 12, Duro indicou que o problema estivo motivado por un vehículo mal aparcado na contorna do Hospital Provincial, que bloqueou o paso do autobús e acabou xerando unha interrupción temporal no percorrido.
O responsable municipal asegurou que ambas incidencias quedaron resoltas e que os horarios foron restablecidos, insistindo en que, máis alá destes episodios, o funcionamento xeral da rede de transporte mantense dentro da normalidade.
