A residencia de estudantes do antigo hospital de Galeras, en Santiago, que estará operativa en setembro de 2025, custará sobre 900 euros ao mes e terá 400 habitacións individuais. Así o explicou este xoves en rolda de prensa o director de investimentos da área inmobiliaria de Bestinver, Enrique Sánchez-Rei, na que detallou que o prezo se adapta á cantidade que ofrecen outras residencias privadas da capital galega.
“É un proxecto moi continuista e que vea por preservar o estilo arquitectónico do edificio e mantéñense, evidentemente, os elementos protexidos”, asegurou Sánchez-Rei. O edifico estará distribuído en nove plantas e as habitacións terán diferentes categorías e as máis grandes contarán con cociña e unha sala de estar.
A nova residencia contará con áreas comúns, como o restaurante-cafetaría, que teñen previsto abrir á comunidade universitaria en xeral aínda que non estea aloxada no edificio, lavandaría e ximnasio, entre outros espazos.
A reforma, para a que iniciaron as obras o pasado mes de abril cando o Concello lle concedeu a licenza, custará sobre 10 millóns de euros aos que deberán sumarlle o equipamento do inmoble. Con todo, aínda que a comercialización vai ser “principalmente para estudantes”, na época estival “van permitir” que funcione como hotel.
