A cidade de Santiago acollerá o vindeiro 30 de maio unha nova edición da carreira SantYago 10K, unha cita que celebra o seu décimo aniversario consolidada no calendario deportivo local e dentro do circuíto de Cidades Patrimonio. A saída terá lugar na zona de San Francisco e a meta estará situada na praza do Obradoiro, nun percorrido urbano de dez quilómetros que se desenvolverá en horario nocturno, con inicio ás 22:00.
Durante a presentación, a concelleira de Deportes, Pilar Lueiro, destacou o carácter da proba como “a festa do deporte”, subliñando que non se trata só dunha competición, senón tamén dun evento pensado para o desfrute da cidadanía. A organización, a cargo do Club Atletismo Fontes do Sar, prevé ambientar o percorrido con actuacións musicais co obxectivo de reforzar o seu compoñente lúdico.
O límite de participación fixouse en 2.000 persoas, tras incrementarse respecto da edición anterior, cando se esgotaron as 1.500 prazas antes do prazo previsto. Segundo explicou o presidente do club organizador, José Antonio Juanatey, o ritmo de inscricións está a ser elevado, con máis de 1.600 participantes rexistrados a falta dun mes para o peche. “Se todo segue igual, volveremos pechar antes de prazo”, indicou.
A carreira conta ademais cunha dimensión solidaria, xa que parte da recadación destinarase á asociación Aspanaes, entidade que traballa coas persoas con trastorno do espectro autista. O seu presidente, Ignacio Labella, puxo en valor a visibilidade que lle ofrece a proba e destacou o papel do deporte como ferramenta de integración: “cando hai unha saída e unha meta, todos somos iguais”.
Pola súa banda, o presidente da Federación Galega de Atletismo, Iván Sanmartín, salientou o crecemento do atletismo na cidade e o atractivo da proba, que combina competición e ambiente festivo. Neste sentido, fixo un chamamento á participación cidadá, tanto para correr como para animar ao longo do percorrido.
No peche da presentación, Lueiro aproveitou para parabenizar os resultados deportivos da fin de semana, destacando eventos solidarios celebrados na cidade e os logros de distintos equipos. Entre eles, mencionou o ascenso do O Compos Sala a Segunda B e trasladou “ánimos” ao Monbus Obradoiro e á SD Compostela de cara ao final de tempada.
