O director xeral de Patrimonio Cultural, Anxo Miramontes, anunciou que a Xunta de Galicia iniciará un proceso de revisión do sistema instalado nas gárgolas do Hostal dos Reis Católicos, situado na praza do Obradoiro, co obxectivo de reducir o impacto visual das estruturas metálicas incorporadas recentemente.
A decisión prodúcese tras varios días de debate público arredor das denominadas lanzas metálicas colocadas nas gárgolas do edificio histórico. Neste contexto, a Administración autonómica mantivo unha reunión con representantes de Turespaña e co equipo de arquitectos responsable da intervención para analizar posibles modificacións.
Segundo explicou Miramontes, os técnicos encargados do proxecto indicaron que a solución actual tiña un carácter en certa medida “provisional”, ao estar orientada a comprobar o funcionamento do sistema de evacuación da auga e o seu efecto sobre a fachada do inmoble. A partir desta avaliación inicial, a Xunta trasladou a necesidade de explorar alternativas técnicas que permitan manter a protección do edificio reducindo ao mesmo tempo o seu impacto visual.
Neste proceso, os equipos técnicos de Patrimonio traballarán de maneira coordinada cos profesionais contratados por Turespaña para analizar distintas opcións e seleccionar a máis axeitada. Entre os aspectos que se estudarán figuran o tamaño das pezas instaladas, a diversidade tipolóxica das gárgolas —que presentan características distintas segundo a súa localización— e os materiais empregados.
No que respecta aos prazos, o director xeral indicou que xa se solicitou documentación técnica e que se prevé un intercambio de expedientes entre as partes implicadas. Ademais, sinalou que a actuación require tamén da participación do Concello de Santiago no relativo ás licenzas, mentres que a Xunta exercerá as súas competencias en materia de protección do patrimonio.
Miramontes subliñou que, desde o punto de vista funcional, o sistema actual cumpre co obxectivo de protexer a fachada da acción da auga, mais incidiu na necesidade de compatibilizar esta finalidade co valor simbólico e patrimonial do espazo. “Tecnicamente a finalidade do que fixeron cúmprese, que é protexer a fachada, pero transmitímoslles que estamos no Obradoiro, que estamos na catedral […] hai facer ese esforzo de combinar eses valores técnicos […] pero buscar outras fórmulas, para que o impacto visual téñase en conta”, concluíu.
