O Centro de Recursos e Servizos de Apoio Empresarial (CERSEA), en Santiago de Compostela, acolleu unha nova sesión do Foro Galego de Cooperación e Solidariedade, un encontro no que representantes de administracións locais galegas puxeron en valor o traballo desenvolvido polo Fondo Galego de Cooperación e Solidariedade e reivindicaron a necesidade de reforzar o compromiso institucional neste ámbito.
A concelleira de Dereitos e Servizos Sociais, María Rozas, foi a encargada de dar a benvida ao encontro, celebrado nun espazo municipal que tamén alberga servizos de promoción económica, emprego e atención ás persoas migrantes. Durante a súa intervención, lembrou que o Fondo Galego está próximo a cumprir tres décadas de traxectoria, destacando que naceu en 1997 como resposta á “crecente sensibilidade cidadá arredor das crises humanitarias, a pobreza mundial, catástrofes e guerras”.
Rozas salientou que actualmente son 124 as administracións locais galegas integradas nesta entidade, unha cifra que cualificou como motivo de orgullo colectivo. A edil compostelá subliñou tamén a necesidade de reivindicar o papel da cooperación internacional nun contexto de cuestionamento social e político, advertindo de discursos que, segundo indicou, “nos retrotraen a épocas pasadas”.
A concelleira fixo fincapé no carácter transversal do Fondo Galego, no que participan entidades de distintos signos políticos, e destacou que ao longo dos anos “o que ficou sempre é o compromiso e a sensibilidade social”. Ademais, puxo como exemplo a súa recente participación nun encontro en Cabo Verde, onde puido coñecer proxectos impulsados polo Fondo e o seu impacto directo na mellora das condicións de vida da poboación local.
Neste sentido, defendeu o papel das administracións locais na consecución de obxectivos globais como a erradicación da pobreza, a sustentabilidade ambiental, a igualdade de xénero ou a defensa dos dereitos humanos, sinalando que, pese a contar con menos recursos, poden realizar achegas significativas. “É unha cuestión de xustiza”, afirmou.
Pola súa banda, o presidente do Foro, Juan González, agradeceu ao Concello de Santiago a acollida do encontro e destacou a centralidade xeográfica da cidade como elemento facilitador da participación das entidades locais galegas. O responsable do Foro incidiu na continuidade dos encontros e na presenza habitual de representantes municipais e provinciais, o que, segundo indicou, reforza a cohesión do proxecto.
González puxo en valor o traballo colectivo desenvolvido no marco do Fondo Galego, salientando que, aínda que as accións poidan parecer pequenas, contribúen a “cambiar a vida das persoas, sobre todo das que máis o precisan”. O presidente deu así inicio formal á asemblea, na que estaba previsto continuar coa orde do día coa intervención da secretaría da entidade.
