A crecente presenza das tecnoloxías dixitais na vida diaria da mocidade centra o novo recurso educativo presentado polos equipos de investigación Stellae, Crie e Edullab, que veñen de publicar a guía ‘Entre a oportunidade e a prohibición: riscos e malos usos da tecnoloxía na adolescencia’. Trátase dun material orientado ao alumnado de Educación Secundaria que busca promover un uso responsable, crítico e seguro das ferramentas dixitais.
A publicación está impulsada no marco dun proxecto estatal no que participan grupos da Universidade de Santiago de Compostela, a Universitat de València e a Universidade de La Laguna, e pode descargarse de forma gratuíta en liña. Editada inicialmente en galego, valenciano e castelán, está prevista tamén a súa tradución ao inglés e ao portugués para ampliar o seu alcance.
A guía forma parte do proxecto de investigación ‘Secundari@ Dixit@l’, centrado na análise dos materiais didácticos dixitais na educación obrigatoria e na elaboración de propostas para o seu uso tanto no ámbito escolar como familiar. Segundo recolle o propio documento, o seu obxectivo é “axudar á mocidade a tomar decisións máis responsables no uso da tecnoloxía”, incorporando recomendacións prácticas adaptadas á realidade cotiá.
Entre os contidos abordados inclúense cuestións como o ciberacoso, a sobreexposición nas redes sociais, o acceso a contidos inapropiados, o uso da intelixencia artificial ou os riscos asociados aos videoxogos e ás compras en liña. A través de explicacións sinxelas e exemplos visuais baseados en situacións reais, o recurso busca facilitar a comprensión destes fenómenos entre o alumnado.
A estrutura da publicación organízase en diferentes bloques que combinan situacións cotiás no ámbito persoal e escolar, recomendacións específicas para adolescentes, recursos complementarios e un cuestionario de autoavaliación sobre hábitos dixitais. Este enfoque pretende ofrecer ferramentas prácticas tanto para o uso individual como para o traballo nas aulas.
A proposta aposta por un modelo educativo que non se basea na prohibición, senón na concienciación e no equilibrio entre oportunidades e riscos. Neste sentido, o documento subliña que o uso responsable da tecnoloxía é unha tarefa compartida entre adolescentes, familias, centros educativos e institucións.
