Un centenar de persoas, concentráronse en Santiago para mostrar o seu apoio á nova misión humanitaria da Global Sumud Flotilla que partirá desde o porto de Barcelona este domingo, 12 de abril. Esta foi unha das mobilizacións convocadas por Global Sumud Galiza nas localidades galegas, que comezaron este pasado sábado e alargaranse até o luns. Paralelamente a Santiago, cidades como Vigo, A Coruña e Lugo sumáronse a esta mostra de solidariedade con Gaza.
Na capital galega, un grupo de nenos abriron a marcha, portando barcos de cartón con frases de apoio á poboación palestina e bandeiras. Os manifestantes partiron da Praza do Toural, rodeando a Praza de Galicia para posteriormente percorrer o Centro histórico até a Praza dás Praterías. Previamente ao comezo da marcha, a portavoz da plataforma en Galicia, Ánxela Gippini, denunciou ante os medios o alto ao lume “inexistente” na franxa de Gaza, xa que continúan os ataques no territorio.
“Temos que seguir denunciando que Palestina continúa ocupada, que Gaza continúa asfixiada, que onte denunciaron a situación de fame pola expulsión das organizacións que alí traballaban. Este foco sempre é polas compañeiras que van a flotilla, pero a flotilla é por Palestina”, proclamou. Ao chegar a Praterías, realizouse a lectura dun manifesto, no que denunciaron o “bloqueo ilegal e ilexítimo” do territorio gazatí, así como o “silenciamiento mediático” dos últimos meses, reforzado coa “agresión imperialista a Irán e ao Líbano”. Neste contexto, a nova misión da flotilla — na que participan 10 galegos — dirixirase para tratar de abrir un corredor humanitario que rompa o “status quo da ocupación” e proporcionar axuda á poboación civil.
“SISTEMA DE SAÚDE DESTRUÍDO”
A mobilización estivo secudanda por distintas plataformas, entre as que se atopa Sanidade Galega por Palestina. Santi González, pertencente á mesma, explicou que entre as cousas que levarán a Gaza están materiais sanitarios de todo tipo, xa que o “sistema de saúde palestino está destruído”. “Loxicamente, o que máis nos preocupa desta destrución do sistema sanitario palestino son as desigualdades en saúde e as barbaridades que se están cometendo contra a poboación de Palestina”, sinalou.
Por iso, a través da flotilla tratarase de dar apoio, fornecendo, entre outros aveños, medicamentos de todo tipo ou material para suturas e cirurxías. Ademais, dentro das embarcacións viaxarán sanitarios para poder ofrecer “axuda directa”.
