O proceso para a transformación do denominado Conector Central de Santiago de Compostela continúa avanzando tras a selección de cinco propostas que pasarán á segunda fase do concurso internacional de ideas. O ámbito de actuación abrangue arredor de 46.000 metros cadrados entre San Clemente e Santa Clara, configurándose como unha das principais arterias de comunicación da cidade.
O xurado, integrado por nove profesionais de diferentes ámbitos, avaliou máis dunha vintena de propostas presentadas nesta primeira fase. As cinco iniciativas elixidas manteñen o anonimato e identifícanse unicamente polo seu lema. A partir de agora, os equipos deberán desenvolver as súas propostas ata un nivel de anteproxecto, que será sometido a unha nova avaliación da que sairá a proposta definitiva.
Entre os criterios valorados polo xurado figuran a viabilidade técnica das propostas, a análise e renovación dos pavimentos, así como a incorporación de elementos de renaturalización do espazo urbano. Ademais, apuntouse a necesidade de profundar nas solucións relacionadas coa mobilidade nalgunhas das propostas seleccionadas.
As cinco finalistas dispoñerán dun prazo de catro meses desde a publicación oficial do anuncio para completar os seus anteproxectos. O equipo gañador recibirá unha compensación económica de 50.000 euros, mentres que as outras catro propostas serán recoñecidas cun accésit de 30.000 euros cada unha.
A intervención neste ámbito urbano está orientada por criterios de sustentabilidade ambiental, mellora da conectividade e impulso da mobilidade peonil. O obxectivo é avanzar cara a un modelo de cidade que priorice a calidade de vida, reducindo o protagonismo do tráfico rodado e favorecendo un uso máis equilibrado do espazo público.
Neste sentido, a actuación pretende superar o actual papel do Conector Central como vía de paso para vehículos particulares, promovendo a creación de novos espazos peonís. Ademais, inclúe medidas para mellorar a xestión da auga mediante sistemas de drenaxe sostible e pavimentos permeables, así como a creación dunha infraestrutura verde que contribúa á calidade ambiental e do aire.
O ámbito tamén desempeña un papel clave na articulación urbana, xa que conecta longitudinalmente o norte e o sur da cidade e, de maneira transversal, o casco histórico coa contorna do Ensanche e barrios como San Pedro ou Sar.
O xurado está presidido polo arquitecto urbanista José María Ezquiaga, profesor da Escola Técnica Superior de Arquitectura da Universidade Politécnica de Madrid e recoñecido con premios como o Nacional de Urbanismo (2005) e o Europeo de Urbanismo (2012). Completa o órgano un equipo técnico no que participan responsables municipais, profesionais designados por colexios oficiais e representantes de institucións vinculadas ao urbanismo e ao patrimonio.
