A Xunta de Galicia licita por máis de oito millóns de euros a construción dun total de 43 vivendas de promoción pública nos concellos de Teo (A Coruña) e Lalín (Pontevedra).
Así o anunciou o presidente da Xunta de Galicia, Alfonso Rueda, este luns tras a reunión semanal do Consello da Xunta, que deu luz verde ás dúas iniciativas.
Concretamente, no municipio de Teo construiranse 26 vivendas de promoción pública na zona das Galanas, cun investimento próximo ao cinco millóns de euros. Construiranse nunha parcela cedida gratuitamente polo Concello e segundo o proxecto redactado por Sabín Branco Arquitectos.
En total construiranse 13 vivendas de dous dormitorios, 10 de tres dormitorios e tres de catro dormitorios. Unha das vivendas de dous dormitorios estará adaptada para o uso por persoas con mobilidade reducida.
A obra licitarase por un importe de 4.927.128,41, aos que hai que sumar os 207.116,91 euros en que se adxudicou o contrato de redacción do proxecto e dirección de obra. O financiamento corresponde na súa totalidade á Xunta de Galicia.
VIVENDAS EN LALÍN
No que respecta a Lalín, alí construiranse 17 vivendas cun investimento próximo aos 3,3 millóns de euros. Levantaranse nunha parcela tamén cedida polo Concello e en base ao proxecto redactado por Germán Gómez Espello.
O inmoble contará cun soto para garaxe, planta baixa destinada a unha vivenda adaptada para persoas con mobilidade reducida, trasteiros e cuartos de servizos e tres plantas máis destinadas a vivendas. En total construiranse 10 vivendas de dous dormitorios, seis de tres dormitorios (unha delas adaptada para o seu uso por persoas con mobilidade reducida), e unha de catro dormitorios.
A obra licitarase por importe de 3.278.227,07 euros aos que hai que sumar os 118.580 euros nos que se adxudicou o contrato de redacción do proxecto e dirección de obra. O financiamento corresponde tamén na súa totalidade á Xunta de Galicia.
