CIG-Saúde denunciou que a área sanitaria de Santiago de Compostela e Barbanza porá en marcha este próximo 4 de abril o decreto que permite a apertura de puntos de atención continuada (PAC) os sábados pola mañá, a pesar de tratarse, segundo o sindicato, dunha medida que fora posposta polo Sergas. A central sindical lembra que esta decisión xerou un “profundo malestar” entre o persoal dos PAC, algo que, segundo apunta, quedou evidenciado na concentración do pasado venres 27 de marzo diante da Consellería de Sanidade.
Segundo denuncia CIG-Saúde, a modificación do decreto aínda non foi publicada oficialmente e permanece unicamente no Portal de Transparencia. Precisamente na mesa sectorial do 27 de marzo, a Secretaría Xeral Técnica asegurara que a medida non entraría en vigor ata o 1 de xuño. A pesar diso, alerta o sindicato, a área compostelá decidiu “adiantarse”, o que implicará que os centros de saúde que ata agora mantiñan actividade os sábados pola mañá —e que non pertencen ao ámbito PAC— pecharán, centralizando a atención nos PAC de referencia.
Así, indican, concellos como Carnota, Outes, Teo, Concepción Arenal, Oroso, Porto do Son ou Mazaricos verán pechados os seus centros nesas franxas, derivando toda a asistencia aos PAC correspondentes. CIG-Saúde critica ademais que todo isto se fixese “sen ningún tipo de comunicación previa á representación dos traballadores”. “Entendemos que debería ser informada antes da toma e aplicación dunha decisión desta relevancia”, lamenta o sindicato.
