A gala aRi[t]mar da música e a poesía galego-portuguesas deu a coñecer as cancións gañadoras da súa edición correspondente a 2025 tras un mes de votacións abertas ao público, no que participaron máis de 5.000 persoas. O proceso culminou coa elección de ‘Será por flores’, de Uxía, como Mellor Música do Ano na Galiza, e de ‘MENINA’, de MAR en colaboración con Carolina Deslandes, como Melhor Música de 2025 en Portugal.
A organización destacou o carácter participativo desta iniciativa, que busca recoñecer a creación musical contemporánea en ambos territorios a través da implicación directa do público. As artistas premiadas recollerán os seus galardóns na gala aRi[t]mar 2026, que terá lugar este outono en Santiago de Compostela.
No caso galego, ‘Será por flores’ foi escollida como a proposta máis valorada polos usuarios. Trátase dun tema no que Uxía explora unha sonoridade próxima á canción de autor, apoiada nunha instrumentación sinxela e cun peso central da voz. A peza reflicte a traxectoria dunha artista cunha carreira de máis de catro décadas, marcada pola conexión coa música tradicional galega e pola apertura a influencias internacionais, especialmente da lusofonía.
Pola súa banda, no ámbito portugués, ‘MENINA’ consolidouse como unha das cancións máis destacadas do primeiro álbum de MAR. O tema combina elementos de música electrónica, pop e R&B contemporáneo, e incorpora unha dimensión narrativa centrada nunha historia en primeira persoa atravesada pola violencia machista e vicaria. A colaboración con Carolina Deslandes reforza unha proposta que aposta pola mestura de estilos e pola exploración sonora.
Ademais das gañadoras, o público tamén situou no podio outras composicións. Na Galiza, o segundo e terceiro posto foron para ‘Todos contra min’, do grupo Ulex, e ‘Perdín a memoria’, de MJ Pérez. En Portugal, completaron a clasificación ‘Brinde (16h00)’, de Carolina Deslandes, e ‘Respirar’, de Calema xunto a Sara Correia.
A gala aRi[t]mar continúa así coa súa liña de visibilización das creacións musicais en galego e portugués, reforzando os vínculos culturais entre ambos territorios e ofrecendo un espazo de recoñecemento ás propostas máis valoradas pola audiencia.
