A Poxa das Uñas de San Lázaro volveu converterse este ano nun dos principais focos da programación festiva do barrio compostelán, cun acto no que participou a alcaldesa de Santiago, Goretti Sanmartín, acompañada por outros membros da Corporación municipal. Xunto á rexedora asistiron tamén a primeira tenenta de alcaldesa, María Rozas, representantes dos distintos grupos políticos con presenza no Concello, persoas vinculadas á hostalaría e numeroso público.
A cita, integrada nos actos da coñecida festa gastronómica de San Lázaro, mantén o protagonismo dun prato tradicional que continúa a mobilizar tanto ao propio barrio como a outros puntos da cidade. Nesta edición son 27 os restaurantes participantes, dous máis ca no pasado ano, os que ofrecen durante estes días a súa propia interpretación das uñas, unha preparación que adoita servirse con bertóns, patacas e chourizo.
Tras a celebración da poxa, a xornada continuou cun concerto da Banda Municipal de Música de Santiago, dirixida por David Fiuza, que puxo o acompañamento musical a un dos momentos máis concorridos da festa.
A programación deste ano ten tamén un compoñente de lembranza. A Asociación Orde da Uña, entidade encargada da organización das actividades, decidiu dedicar esta edición á memoria de Evaristo Carracedo, Ramón Carril, José Luis Míguez, Manuel Moure e Pepe Puente, veciños do barrio e fundadores da propia asociación.
