O presidente da Xunta e líder do Partido Popular de Galicia, Alfonso Rueda, afirmou que o portavoz popular en Santiago, Borja Verea, sería “un magnífico candidato” á alcaldía da capital galega, aínda que evitou confirmar oficialmente a súa designación. Preguntado polos medios, Rueda insistiu en que o PP dará a coñecer os seus candidatos ás alcaldías “no seu momento”, seguindo os procedementos internos da formación.
“Cando se nos pregunta polos posibles alcaldables sempre dicimos o mesmo: anunciaranse cando corresponda”, sinalou o líder popular, quen tamén destacou que Verea “está a facer as cousas moi ben” no seu papel á fronte do grupo municipal en Santiago. O presidente da Xunta asegurou ademais que o partido pretende presentar os seus candidatos “canto antes”, pero subliñou que non pode confirmar ningún nome até que exista unha comunicación oficial. “Para iso temos unhas canles. Somos un partido que funciona de forma ordenada”, concluíu Rueda.
