A Concellería de Educación de Santiago de Compostela, dirixida por Míriam Louzao, anunciou que as escolas unitarias de Gaioso no Eixo, Rial en Laraño e Bispo Teodomiro en Marrozos incorporarán no vindeiro curso o servizo de madrugadores e almorzo. A medida amplía a oferta complementaria destes centros do rural compostelán e faise pública coincidindo co período de solicitude de praza.
Segundo avanzou o Concello, o novo servizo funcionará desde as 7:30 ata o comezo da actividade lectiva. A súa posta en marcha engádese ao servizo de xantar que xa entrou en funcionamento neste curso 2025/2026 nas escolas unitarias compostelás.
A administración local sinala que a comunicación desta novidade neste momento busca que as familias interesadas, así como aquelas que aínda están valorando a escolarización das súas fillas e fillos, poidan ter en conta esta ampliación de prestacións á hora de elixir centro.
