O concelleiro non adscrito Gonzalo Muíños reclamou hoxe medidas urxentes para resolver a situación da Comisaría da Policía Nacional da cidade tras o incendio rexistrado hai máis dun mes nas súas instalacións. Segundo denunciou, o servizo continúa a funcionar en condicións que cualificou de precarias e sen que se adoptasen solucións estruturais para garantir unha atención adecuada á cidadanía.
Muíños sinalou que á situación derivada do incendio súmase a falta de medios materiais que quedaron inutilizados polo lume e que, segundo indicou, aínda non foron substituídos. Neste sentido, advertiu de que esta circunstancia afecta á capacidade operativa do corpo policial nun contexto no que a demanda de presenza policial segue a ser elevada por parte da veciñanza.
O concelleiro non adscrito instou ao delegado do Goberno en Galicia a demostrar o compromiso adquirido no seu momento para que a comisaría de Santiago acade a categoría de Comisaría Principal, e pediulle que impulse medidas concretas para resolver a situación actual. Entre elas, destacou a necesidade de habilitar unha localización provisional que permita reorganizar o servizo.
Segundo explicou, esta alternativa debería contar tamén coa colaboración do Concello de Santiago. “É imprescindible que se procure ofrecer unha localización alternativa, un edificio no que se poida mellorar a prestación dos servizos á cidadanía ou, cando menos, que facilite a organización operativa da Policía Nacional”, afirmou.
Muíños tamén reclamou unha maior coordinación institucional para abordar esta cuestión e criticou o que cualificou como unha resposta insuficiente por parte das administracións implicadas. Neste contexto, fixo referencia á petición de reunión realizada polo Sindicato Unificado de Policía (SUP) á alcaldesa de Santiago hai aproximadamente unha semana e que, segundo indicou, non obtivo resposta ata o momento.
Outro dos aspectos sinalados polo concelleiro foi a situación do parque móbil da Policía Nacional na cidade. Segundo expuxo, máis de 40 vehículos policiais permanecen inutilizados no interior do edificio afectado polo incendio, sen que se coñezan as condicións nas que se atopan nin se anunciase a súa substitución por parte do Ministerio do Interior.
Ante esta situación, Muíños considerou necesario actuar con rapidez para garantir que o servizo policial continúe a prestarse con normalidade. “É urxente dotar de medios e infraestrutura o servizo para que siga a prestar un servizo fundamental e demandado”, sinalou, ao tempo que pediu que as administracións implicadas demostren o seu compromiso con medidas concretas.
