A cidade de Santiago de Compostela acollerá o vindeiro domingo 29 de marzo unha manifestación nacional pola visibilidade trans, convocada pola asociación ‘Arelas. Familias de Infancia e Mocidade Trans de Galicia‘. A mobilización está prevista para as 12:00, con saída dende a praza 8 de Marzo e percorrido ata a praza do Obradoiro, onde se dará lectura a un manifesto colectivo.
Segundo explican dende a organización nas súas redes sociais, a convocatoria busca reivindicar a defensa dos dereitos das persoas trans e chamar á mobilización social fronte aos discursos e políticas que consideran regresivas. No chamamento á participación sinalan que, tras anos de mobilización, existe o risco de que a sociedade dea por consolidados determinados avances. Por iso sosteñen que “os dereitos se defenden tamén nas rúas, e que non imos deixar que nos fagan desaparecer”.
A manifestación conta co apoio dun manifesto asinado ata o momento por máis de setenta organizacións, colectivos sociais, sindicais, políticos e culturais, entre os que figuran entidades como Chrysallis, SOS Racismo Galicia, Rede Educativa de Apoio LGTBIQ+ de Galicia, a Confederación Intersindical Galega, Compostela Aberta, o Bloque Nacionalista Galego, Esquerda Unida ou Federación Galega de Ecoloxistas en Acción, entre outras.
No texto, as entidades promotoras sinalan que a mobilización pretende visibilizar as realidades diversas das persoas trans e denunciar diferentes formas de discriminación. Entre outras cuestións, o manifesto fai referencia á situación das persoas trans migrantes e racializadas, que segundo os asinantes sofren “unha dobre discriminación”, tanto pola transfobia como polo racismo e polas dificultades burocráticas para ver recoñecida legalmente a súa identidade.
Tamén se reclama o recoñecemento das persoas non binarias, denunciando que continúan sen ter encaixe nas normativas actuais, así como unha maior protección para as infancias trans, xa que consideran que a lexislación estatal de 2023 deixa “nunha lagoa legal” ás persoas menores de doce anos.
O documento aborda igualmente outras cuestións vinculadas ás condicións de vida das persoas trans, como o acceso á sanidade, á educación ou ao emprego, e reivindica máis recursos públicos e medidas específicas para combater a discriminación e o acoso, especialmente nos ámbitos educativo e sanitario.
Entre as demandas recollidas no manifesto inclúense protección legal efectiva para as persoas trans, acceso digno á saúde, á educación e ao emprego, programas de refuxio para persoas perseguidas nos seus países ou campañas educativas contra a desinformación, ademais do recoñecemento legal das persoas non binarias e das menores de doce anos.
Os colectivos impulsores sosteñen que a mobilización busca tamén denunciar o aumento de discursos de odio e determinadas posicións políticas contrarias aos dereitos trans, e reivindican que “os dereitos trans son dereitos humanos”.
A convocatoria permanece aberta á adhesión de novas entidades a través dun formulario público difundido pola organización, mentres que a mobilización do día 29 pretende reunir en Santiago colectivos e persoas chegadas de diferentes puntos de Galicia para visibilizar estas reivindicacións no espazo público.
