A concelleira do Partido Popular de Santiago Yolanda Otero mantivo recentemente unha reunión con integrantes da Asociación Compostelá de Diabetes para coñecer a situación da entidade e as necesidades coas que se atopa no desenvolvemento do seu traballo. Tras o encontro, a edil popular reclamou ao goberno municipal de BNG e Compostela Aberta que facilite un local axeitado para a actividade da asociación.
Segundo explicou Otero, a entidade carece actualmente dun espazo suficiente para realizar as súas actividades. A concelleira sinalou que “o actual espazo cedido é notablemente insuficiente e non responde ás necesidades reais da asociación”, polo que considera necesario habilitar un local que permita desenvolver o seu labor “en condicións dignas e con horarios amplos e flexibles”.
Na actualidade, a asociación desenvolve a súa actividade nun espazo compartido no Centro Sociocultural José Saramago, no barrio de Vite. A súa presenza neste lugar limítase a dous días á semana, os luns e xoves entre as 18:00 e as 20:00, un horario que, segundo indicou Otero, restrinxe a capacidade da entidade para prestar servizo ás persoas usuarias.
A concelleira popular destacou o papel social da asociación, que presta apoio e orientación a persoas con diabetes e ás súas familias tanto do municipio como da súa contorna. Tamén atende a visitantes que, durante a súa estancia en Santiago, precisan asesoramento sobre o manexo da enfermidade. Ademais, funciona como punto de encontro e referencia para integrantes doutras asociacións relacionadas coa diabetes.
Neste contexto, Otero subliñou que “se trata dunha entidade que desenvolve unha destacada labor social e que precisa un local axeitado para seguir prestando os seus servizos á veciñanza”. Engadiu tamén que o apoio institucional non debería limitarse a datas sinaladas, como o Día Mundial da Diabetes, que se celebra o 14 de novembro, senón manterse ao longo de todo o ano.
A edil lembrou que o grupo municipal popular xa presentara no pleno unha proposta para que o Concello cedese á entidade un espazo adecuado para a súa actividade. Segundo afirmou, esta iniciativa non contou co respaldo do goberno municipal, polo que reiterou a necesidade de atender as demandas do tecido asociativo da cidade.
A Asociación Compostelá de Diabetes, creada en 1986, é a entidade máis antiga deste ámbito en Galicia. Na actualidade ostenta a presidencia e a secretaría da Federación Galega de Pacientes de Diabetes. Mentres asociacións similares doutras cidades galegas, como A Coruña, Ourense ou Ferrol, contan con sede propia, a de Santiago continúa desenvolvendo a súa actividade nun espazo compartido.
Entre as accións que promove a entidade atópanse programas formativos, atención personalizada —especialmente dirixida a persoas maiores—, obradoiros de nutrición, asesoramento sobre o uso de sensores e bombas de insulina, revisión de pés ou acompañamento no tratamento farmacolóxico.
Segundo os datos máis recentes do Instituto Nacional de Estatística, en 2024 rexistráronse 10.288 falecementos por diabetes en España. En Galicia hai máis de 250.000 persoas diagnosticadas con esta enfermidade crónica, unha realidade que tamén afecta á área de Santiago e que, segundo sinalan desde o PP, evidencia a importancia de reforzar o apoio ás entidades que traballan neste ámbito.
