A candidata á reitoría da Universidade de Santiago de Compostela (USC), Maite Flores, reivindicou este luns nun acto convocado pola propia universidade con motivo do 8M que “está partindo” na segunda volta das eleccións, despois da vitoria de Rosa Crujeiras na primeira votación. No último día de campaña electoral, Flores pediu á comunidade universitaria que participe na segunda volta e que “non deixe de ir votar nin vote en branco”, especialmente a aqueles que apoiaran algunha das candidaturas que quedaron fóra tras a primeira rolda.
A aspirante tamén criticou o equipo da súa rival, ao considerar que están “un pouco anestesiados” e por “non querer responder” ás preguntas que, segundo afirmou, formulan desde a súa candidatura. A pesar de recoñecer que “non sabe cal vai ser o resultado final”, mostrouse optimista sobre o desenlace da votación, e comparou a campaña cun partido no que confía en obter “un bo resultado”. Flores subliñou ademais que as propostas das dúas aspirantes á reitoría son “moi diferentes”, defendendo o seu proxecto para a universidade.
“Levámolo ben, con enerxía e ilusión, agradecendo á xente que siga confiando en nós porque cada vez temos máis constancia de que a xente vai confiando en nós”, afirmou. Con todo, avanzou que seguirá intensificando a campaña ata as doce da noite, momento no que se pechará oficialmente o período electoral e dará comezo a xornada de reflexión previa ás votacións deste mércores.
