Santiago de Compostela será escenario este luns, 9 de marzo, dun encontro académico internacional dedicado a analizar os retos da democracia contemporánea e a crecente polarización política no mundo. A conferencia, titulada ‘Democracia e gobernación global: retos e desafíos no século XXI’, reunirá na cidade a varios especialistas de universidades dos Estados Unidos convidados polo Foro Económico de Galicia e polo International Center for Decentralization and Governance (Ideagov), entidade con sede na Universidade de Santiago de Compostela (USC).
A xornada desenvolverase entre as 16:00 e as 20:00 no Centro de Estudos Avanzados, situado no parque de Vista Alegre, e contará coa participación de investigadores que analizarán diferentes dimensións do funcionamento das democracias actuais.
Entre os relatorios previstos figuran as intervencións de Jonathan Rodden, da Universidade de Stanford; Erik Wibbels e Guy Grossman, da Universidade de Pennsylvania; e Pablo Beramendi, da Universidade de Duke. O encontro abordará cuestións como as raíces da hostilidade partidista, a situación actual da democracia estadounidense ou o impacto da redución da axuda internacional no contexto global.
As sesións estarán moderadas polas profesoras María Lourerio, da Universidade de Santiago de Compostela, e Miriam Hortas-Rico, da Universidade Autónoma de Madrid, que conducirán o debate entre os especialistas invitados.
A apertura institucional do acto contará coa intervención do reitor da USC, Antonio López;do secretario xeral de Universidades da Xunta de Galicia, José Alberto Díez de Castro; do presidente do Foro Económico de Galicia, Víctor Nogueira, e do responsable de Ideagov, Santiago Lago, quen darán comezo a unha xornada centrada na análise académica dos desafíos que afrontan os sistemas democráticos nun contexto internacional marcado pola polarización política e as transformacións da gobernanza global.
