A carreira ‘Os 10.000 Peregrinos’ encherá de atletas as rúas de Santiago de Compostela o próximo 22 de marzo, nunha cuarta edición que contará con distancias adaptadas ás diferentes capacidades dos corredores. A iniciativa está organizada pola Deputación da Coruña en colaboración coa Federación Galega de Atletismo e o Concello de Santiago, e foi presentada este xoves no Hostal dos Reis Católicos polo presidente da Deputación, Valentín González Formoso; o presidente da Federación, Iván Sanmartín; e a concelleira de Deportes, Pilar Lueiro.
Durante o acto, conducido polo xornalista Terio Carrera, explicaron que aínda quedan dez días para pechar o prazo de inscrición, e que todo apunta a que se superarán os 3.000 participantes. Sanmartín destacou que se trata dunha proba na que “conflúen atletas de primeiro nivel con atletas populares”, converténdose nunha cita deportiva cada vez máis consolidada.
PERCORRIDO POLO CORAZÓN DE COMPOSTELA
A carreira arrincará na praza de San Francisco e rematará na praza do Obradoiro, onde se instalará unha pantalla xigante para seguir a proba. O percorrido discorrerá polo corazón da cidade, atravesando a Zona Vella e o Ensanche, ata completar os 10 quilómetros. Entre as novidades desta edición destaca a incorporación da modalidade ‘2K sen barreiras’, pensada para facilitar a participación de todo tipo de público, independentemente das súas capacidades. Desde a organización tamén animaron á cidadanía compostelá a saír ás rúas para vivir o ambiente da carreira, un evento que, segundo destacaron, está a gañar recoñecemento non só en Galicia, senón tamén en España e a nivel europeo.
Formoso subliñou que esta iniciativa encaixa coa filosofía da Deputación de promover o deporte e unha vida saudable, e destacou que en catro anos se triplicou a afluencia de público. Pola súa banda, Pilar Lueiro definiu a carreira como “a festa do deporte en Santiago”, un evento que permite gozar do deporte tanto correndo como animando aos participantes, e valorou especialmente a nova modalidade inclusiva como “unha oportunidade para todos”.
