A candidata á reitoría da Universidade de Santiago de Compostela, Rosa Crujeiras, presentou este mércores as persoas que proporá para ocupar a xerencia e a secretaría xeral da institución no caso de resultar elixida no proceso electoral que culminará o próximo 11 de marzo. Durante o anuncio, a profesora destacou a “ilusión e gratitude” das persoas propostas pola súa disposición a integrarse no proxecto de goberno universitario.
Para a xerencia da USC, Crujeiras propón a Juan Díaz Villoslada, a quen definiu como “un profesional cunha dilatada traxectoria na xestión pública, en particular na xerencia universitaria”. Díaz Villoslada foi xerente da Universidade da Coruña (UDC) entre 2012 e 2016 e conta cunha ampla experiencia en administración pública.
Segundo explicou a candidata, Villoslada estaría acompañado na estrutura de xestión por Emilio Martínez Rivas, técnico de xestión da propia universidade, quen colaboraría de maneira transitoria no proceso de adaptación ao novo modelo de xerencia. Crujeiras indicou que esta área terá que afrontar “dous grandes desafíos: o relevo xeracional e a simplificación administrativa, en coordinación con toda a nosa estrutura de xestión”.
No que respecta á secretaría xeral, Crujeiras anunciou a proposta de Alicia Villalba Sánchez, profesora titular de Dereito do Traballo e da Seguridade Social na USC. Este órgano é responsable de cuestións clave relacionadas co funcionamento institucional, a normativa universitaria e os procedementos de goberno da universidade.
A candidata á reitoría pechou a súa intervención cunha mensaxe de agradecemento ao equipo presentado: “A todos eles teño que agradecerlles a súa disposición para formar parte deste proxecto”. Segundo sinalou, estas incorporacións permitirían configurar “un equipo sólido, experimentado e con coñecemento” para afrontar os retos de futuro da universidade compostelá.
PERFÍS PROFESIONAIS
Juan Díaz Villoslada é licenciado en Dereito pola USC e funcionario tanto da Xunta de Galicia como do Concello da Coruña, onde exerce actualmente como xefe do servizo de Tesourería. Ao longo da súa carreira desempeñou responsabilidades na administración universitaria e na política institucional, entre elas a xerencia da UDC, un escano no Parlamento de Galicia e o cargo de concelleiro de Urbanismo na Coruña. A súa traxectoria inclúe ámbitos como a xestión orzamentaria, os recursos humanos, a inspección administrativa e a planificación urbana.
Emilio Martínez Rivas, tamén licenciado pola USC, é técnico de xestión na Área de Valorización, Transferencia e Emprendemento da universidade compostelá. Ao longo da súa carreira ocupou cargos de responsabilidade na Xunta de Galicia, no Concello de Lugo e na Universidade de Vigo, ademais de desenvolver actividade investigadora e de publicación sobre innovación e cooperación. Entre outras funcións, presidiu a Coordinadora Galega de ONGDs e participou como experto no Consello Galego de Cooperación.
Pola súa banda, Alicia Villalba Sánchez é profesora titular de Dereito do Traballo na USC, universidade na que se licenciou con premio extraordinario e na que obtivo o doutoramento con cualificación cum laude. A súa actividade investigadora desenvolveuse en distintos centros e proxectos, incluíndo iniciativas europeas. Na actualidade lidera un campus dedicado á igualdade laboral entre España e Portugal.
