O Consello de Estudantado da USC organiza este venres 6 de marzo ás 18:00 horas un debate cara a cara entre as dúas candidatas que optan á Reitoría, Maite Flores e Rosa Crujeiras, no marco da segunda volta das eleccións á máxima responsabilidade académica da institución.
O encontro terá lugar no Salón de Actos da Facultade de Ciencias Políticas e Sociais e está impulsado de maneira colaborativa pola Asemblea de Investigadoras de Compostela, o Consello de Estudantado e o colectivo de PTXAS A Trabe. A iniciativa pretende ofrecer un espazo de contraste directo entre as dúas aspirantes á Reitoría antes da votación definitiva.
Desde a organización animan á comunidade universitaria a asistir ao acto e participar no debate público sobre o futuro da universidade. A través das redes sociais, o Consello de Estudantado fixo un chamamento á mobilización do alumnado lembrando que “o noso voto é fundamental” no proceso electoral.
O debate desenvolverase poucos días antes da segunda volta das eleccións reitorais, na que a comunidade universitaria deberá escoller entre as candidaturas de Maite Flores e Rosa Crujeiras para liderar a USC nos próximos seis anos.
