O coordinador de José Luis Calo, representante de UCIN, fixo pública a súa petición dun “cambio inmediato” no Concello de Ames tras, segundo indicou, as críticas expresadas por veciñanza do municipio respecto da situación política actual.
Calo dirixiuse directamente aos grupos da oposición municipal, PP de Ames e BNG de Ames, aos que instou a “poñerse de acordo, elixir un candidato e presentar unha moción de censura que permita abrir unha nova etapa política no municipio”. Ao seu xuízo, se consideran que o actual alcalde non está a cumprir coas súas funcións, deben empregar os mecanismos previstos no ordenamento democrático. “Se realmente cren que o actual alcalde non está á altura, teñen a ferramenta democrática para cambiar a situación. O demais son escusas”, afirmou.
O coordinador autonómico sostén que o clima político local está a derivar nun escenario de confrontación que, segundo manifestou, repercute na cidadanía. “Os veciños non poden seguir atrapados en xogos partidistas”, sinalou, ao tempo que advertiu de que, de non producirse cambios no prazo dun mes, “terán perdido todos: o goberno e a oposición. E, sobre todo, terá perdido Ames”.
Segundo trasladou, a formación recolle o malestar de persoas que perciben unha falta de dirección clara no consistorio. Neste sentido, indicou que o municipio precisa “estabilidade, xestión eficaz e transparencia” e que non pode permanecer nunha situación de bloqueo continuado.
Dende UCIN defenden que é o momento de promover un modelo político centrado na xestión municipal. Calo asegurou que a súa formación está disposta a liderar un proxecto que cualificou de “transparente, municipalista e centrado nas persoas”, co obxectivo de recuperar a confianza da cidadanía na institución local.
Ademais, advertiu de que, no caso de que a oposición non impulse a iniciativa que propón, quedará, ao seu entender, en evidencia unha situación de inmobilismo. “Ames merece un goberno que escoite, que renda contas e que priorice o benestar dos seus veciños por riba de calquera cálculo político”, concluíu.
Con este posicionamento, a formación sitúase como alternativa no escenario político municipal e apela á responsabilidade dos grupos con representación no pleno do Concello de Ames ante os vindeiros movementos que poidan producirse no consistorio.
