O portavoz socialista en Santiago, Aitor Bouza, anunciou esta mañá que o seu grupo trasladará ao Parlamento de Galicia a situación das infraestruturas en dous centros educativos da cidade, co obxectivo de reclamar á Xunta actuacións urxentes e a inclusión dunha partida específica nos orzamentos autonómicos de 2026.
Bouza explicou que a iniciativa se centrará, de maneira prioritaria, no CEIP Santiago Apóstolo e no CEIP de Fontiñas, onde, segundo indicou, existen deficiencias nas cubertas dos edificios que levan tempo sendo reclamadas pola comunidade educativa. “Imos esixir ao conselleiro de Educación e ao presidente da Xunta que se comprometan con esta cidade e que non miren cara outro lado”, afirmou.
No caso do CEIP Santiago Apóstolo, o socialista sinalou que a situación das infraestruturas foi posta de manifesto recentemente no Pleno municipal. Segundo indicou, a comunidade educativa leva meses, e mesmo anos, reclamando unha intervención integral no centro, incluíndo actuacións no tellado.
Tamén fixo referencia ao CEIP de Fontiñas, onde asegurou que a cuberta precisa dunha actuación urxente. O obxectivo do PSdeG é que ambas intervencións queden recollidas nos próximos orzamentos autonómicos.
Bouza apelou á unidade dos grupos políticos para reclamar estas melloras ante a Xunta. “Non se poden facer frontes comúns só para determinadas cuestións e non para reclamar as melloras das infraestruturas educativas”, declarou, ao tempo que propuxo visitar conxuntamente os centros para trasladar á Administración autonómica a demanda.
FALTA DE PROFESORADO ESPECIALIZADO
A rolda de prensa tamén abordou a situación do persoal docente de apoio. O portavoz socialista referiuse á falta de profesorado de pedagoxía terapéutica e audición e linguaxe en varios centros composteláns, unha cuestión que, segundo indicou, foi denunciada ao inicio do curso escolar.
Entre os exemplos mencionados atópase o CEIP Monte dos Postes, onde se realizaron mobilizacións para reclamar máis recursos. Bouza asegurou que esta carencia non é un caso illado e que afecta a distintos colexios da cidade.
Neste contexto, anunciou que o Partido Socialista participará na mobilización convocada en Santiago para reclamar máis medios educativos. “Estaremos alí para apoiar á comunidade educativa nas reivindicacións que están facendo”, sinalou.
DEBATE SOBRE O MODELO DA AUGA
Na comparecencia tamén se referiu ao debate municipal sobre o modelo de xestión do ciclo integral da auga. Bouza criticou a postura do Partido Popular no último Pleno e considerou que determinadas decisións poden afectar á veciñanza.
Segundo explicou, o PSdeG presentou máis de setenta propostas ao borrador do Goberno local e agarda agora coñecer cales foron incorporadas antes de fixar definitivamente a súa posición.
“O noso compromiso é coas veciñas e veciños de Compostela e con trasladar as súas demandas ás institucións correspondentes”, concluíu, insistindo en que as reclamacións educativas serán levadas ao ámbito autonómico para procurar unha solución ás deficiencias detectadas.
