O Movemento Sumar Terras de Compostela realizou unha valoración do pleno ordinario celebrado este xoves, no que o Partido Popular e as concelleiras non adscritas bloquearon o cambio de denominación do CEIP Apóstolo Santiago e a aprobación do punto sobre o modelo de xestión do ciclo integral da auga.
En relación co centro educativo da Almáciga, Sumar sinala que a proposta de cambio de nome fora promovida pola comunidade escolar, impulsada pola ANPA e aprobada por unanimidade no Consello Escolar tras un proceso de dous anos. A formación entende que a decisión adoptada no pleno supón desatender unha iniciativa que, segundo destaca, cumpriu os procedementos establecidos.
Dende Sumar indican que “rexeitar unha decisión avalada pola propia comunidade educativa é unha falta de respecto institucional e un ataque directo á participación democrática”, e subliñan que o proceso contou co respaldo dos órganos internos do centro. A formación engade que a escola pública “non pode ser utilizada como campo de batalla ideolóxico nin vítima dun conservadurismo que despreza os procesos colectivos”.
DEBATE SOBRE O SERVIZO DA AUGA
No mesmo pleno abordouse a proposta relativa á fórmula de xestión do servizo da auga. Segundo Sumar, o PP defendera na Comisión da Auga a continuidade da concesión privada, mais optou finalmente pola abstención na sesión plenaria.
A organización considera que esta posición “impide avanzar cara a unha solución estable e transparente para un contrato en precario desde 2019”. Na súa valoración, inciden en que a auga é “un servizo público esencial” que non debería estar, ao seu xuízo, condicionado por cálculos partidarios.
Sumar interpreta o desenvolvemento do pleno como un exemplo de “bloqueo político deliberado” por parte da oposición e asegura que esta actitude non ofrece alternativas nin contribúe a mellorar a xestión municipal. A formación reafirma o seu compromiso cun modelo de municipalismo baseado na participación cidadá e na defensa dos servizos públicos como dereitos básicos.
