O BNG volveu instar ao Goberno central a que autorice a cesión gratuíta e definitiva do tramo ferroviario en desuso situado entre Fraiz e A Moniña, no concello de Ames, co obxectivo de facilitar a súa transformación nunha senda verde destinada á mobilidade peonil e ciclista.
Segundo trasladan os nacionalistas, a resposta oficial do Executivo indica que Administrador de Infraestructuras Ferroviarias (ADIF) está “en total disposición de ceder o uso dese tramo” ao Concello de Ames mediante a fórmula dun contrato de vía verde, cunha renda testemuñal e un prazo inicial de 20 anos. Na comunicación tamén se sinala que o consistorio debe dirixirse á Xerencia de Patrimonio e Urbanismo Noroeste da entidade para tramitar a solicitude.
UN TRAMO SEN USO FERROVIARIO
O deputado do BNG no Congreso, Néstor Rego, considera que esta proposta non responde ás demandas formuladas. A seu xuízo, o tramo atópase “completamente abandonado, cuberto de maleza e en progresiva deterioración”, tras perder a súa funcionalidade como infraestrutura de transporte.
Rego defende que a recuperación deste espazo permitiría habilitar un corredor de mobilidade sustentable e de lecer para a veciñanza de Ames, reforzando a conexión entre núcleos e ampliando as alternativas de desprazamento non motorizado nun municipio da área compostelá cun crecemento demográfico significativo nos últimos anos.
REIVINDICACIÓN DUNHA CESIÓN DEFINITIVA
O BNG entende que a fórmula dun contrato temporal, mesmo cunha renda simbólica, resulta “insuficiente”. “Debe ser unha cesión gratuíta e definitiva”, sinala o deputado, que considera que o traspaso da titularidade ao Concello permitiría asumir con garantías a conservación, recuperación e posta en valor da antiga infraestrutura ferroviaria.
Para os nacionalistas, a existencia dunha vontade política clara debería traducirse nun acordo que facilite a integración deste espazo na planificación municipal e na súa adaptación como senda verde, sen limitacións temporais nin cargas económicas, por pequenas que sexan.
A proposta enmárcase nas iniciativas impulsadas polo BNG para promover a reutilización de infraestruturas ferroviarias en desuso como itinerarios verdes, unha fórmula que xa funciona noutros puntos do Estado e que, segundo defenden, pode contribuír á mellora da calidade de vida e á promoción dunha mobilidade máis sustentable na contorna de Santiago e a súa comarca.
